Foto: ashyq derekkóz
Memleket basshysy bala quqyqtaryn qorǵaý salasyna aýqymdy ózgerister engizetin «Quqyq buzýshylyq profilaktikasy týraly» Qazaqstan Respýblikasynyń Zańyna qol qoidy. Zań kámeletke tolmaǵandar arasyndaǵy jáne olarǵa qarsy jasalatyn quqyq buzýshylyqtardyń ýaqytyly aldyn alýdan bastap, shuǵyl kómek infraqurylymyn qurýǵa, óńirlik bala quqyqtaryn qorǵaý jónindegi basqarmalaryn ashýǵa jáne bala quqyqtaryn qorǵaý salasyndaǵy zańnamany buzǵany úshin laýazymdy tulǵalardyń derbes jaýapkershiligin kúsheitýge arnalǵan, dep habarlaidy Ult.kz.
Barlyq negizgi normalar QR Bala quqyqtary jónindegi ýákilmen jáne depýtattyq korpýspen birlesip ázirlendi.
Zań aiasyndaǵy mańyzdy jańashyldyqtyń biri – elimizde zorlyq-zombylyqtan zardap shekken balalarǵa kómek kórsetý kabinetteriniń ashylýy. Munda kámeletke tolmaǵandarǵa «bir tereze» qaǵidatymen keshendi qoldaý kórsetiledi.
Balaǵa qolaily jaǵdaida alǵashqy psihologiialyq kómek , sot-meditsinalyq saraptama júrgizý, beiindi mamandardyń qatysýymen saýalnama alý siiaqty keshendi sharalar qarastyrylǵan. Bul balanyń kóptegen uiymdarǵa barý qajettiligin joiyp, onyń psihologiialyq turǵydan qaita jaraqat alýyna jol bermeidi.
Sonymen birge bilim berý uiymdarynda «basa nazar aýdarýdy qajet etetin kámeletke tolmaǵandardy pedagogikalyq súiemeldeý» institýty engiziledi. Bul shara quqyq buzýshylyqtardyń ýaqytyly aldyn alýǵa jáne balalarǵa der kezinde kómek kórsetýge arnalǵan.
Sondai-aq Zańda balalardyń quqyqtary men zańdy múddelerin qorǵaýdyń biryńǵai vertikalin qurý úshin óńirlik Balalardyń quqyqtaryn qorǵaý basqarmalaryn ashý kózdelgen. Jańa qurylymdar úilestirý jumystaryna, aldyn alý sharalaryna, jedel qorǵaýǵa jáne «táýekel tobyndaǵy» balalarǵa kómek kórsetýge jaýapty bolady.
Jańa normalardy iske asyrý maqsatynda tiisti qaǵidalar bekitiledi.
