Foto: Aqorda
Prezident Vetnam delegatsiiasyna iltipat bildire otyryp, bul sapar eki el arasyndaǵy bailanystardy nyǵaitýǵa yqpal etetinin atap ótti, dep habarlaidy Ult.kz.
Sondai-aq Vetnamnyń 2040 jylǵa deiin álemdegi eń iri 25 ekonomikanyń qataryna kirýdi kózdeitin strategiialyq maqsatyn qoldap, Qazaqstan tarapy osy órshil mindetti oryndaý isine jan-jaqty atsalysýǵa daiyn ekenin jetkizdi.
Kelissóz barysynda ózara saýda-sattyq kólemin ulǵaitý máselesine airyqsha mán berildi.
- ➤ Byltyr eki el arasyndaǵy taýar ainalymy 860 million dollarǵa jetken.
- ➤ Taraptar taiaý jyldary bul kórsetkishti 2 milliard dollarǵa jetkizýge nietti.
Qasym-Jomart Toqaev pen To Lam týrizm salasyndaǵy birlesken jumystyń perspektivasy týraly pikir almasty. Qazir Qazaqstan men Vetnam arasynda vizasyz rejim ornady, al áýe qatynastarynyń sany 40-tan asty.
Memleket basshysy Vetnam azamattarynyń qyzyǵýshylyǵyn týdyrýy múmkin Qazaqstandaǵy týristik aimaqtardy zerdelep kórýdi usyndy.
To Lam Memleket basshysy Qasym-Jomart Toqaev pen Qazaqstan halqyna qonaqjailyq tanytqany úshin rizashylyǵyn bildirip, Vetnam Prezidenti Lyong Kyongtyń ystyq yqylasyn jetkizdi.
"Vetnam men Qazaqstannyń ortasynda ondaǵan jyldar boiyna tyǵyz qarym-qatynas ornaǵan. 1959 jyldyń tamyz aiynda bizdiń Prezidentimiz Ho Shi Min Qazaqstanǵa resmi saparmen kelgen bolatyn. Bul sapar qos halyq arasynda dástúrli dostyq pen uzaqmerzimdi seriktestiktiń berik negizin qalady. Sodan beri eki eldiń bailanysy kóshbasshylar men azamattardyń kúsh-jigeri arqasynda udaiy damyp keledi. Qazaqstan erterekte elimizdegi ult-azattyq kúreske kómek kórsetti, qazirgi kezde de bizdi jan-jaqty qoldap keledi. Sol úshin Vetnam halqy men partiiasy sizderge dán riza", – dedi Vetnam Kompartiiasy OK Bas hatshysy.
Óz kezeginde Qasym-Jomart Toqaev To Lamdy I dárejeli «Dostyq» ordenimen marapattady. Prezident Qazaqstan men Vetnamdy tereńnen tamyr tartatyn dostyq qarym-qatynas bailanystyratyn atap ótti. Sonymen qatar 1959 jyly Qazaqstanǵa Vetnamnyń tuńǵysh Prezidenti Ho Shi Minniń kelgenin eske saldy. Bul sapar eki eldiń san qyrly yntymaqtastyǵyn damytýdyń berik negizin qalaǵan edi.
Qasym-Jomart Toqaev Qazaqstan men Vetnam shynaiy strategiialyq áriptestik ornatqanyn aitty.
"Sizdiń Qazaqstanǵa memlekettik saparyńyzdyń tarihi mańyzy zor. Bul qazaq-vetnam qatynasyn damytýdyń mańyzdy kezeńi bastalǵanyn kórsetedi. Búgingi kelissózder qorytyndysy boiynsha ekijaqty yntymaqtastyqty jańa deńgeige kóteretin strategiialyq seriktestik ornatýǵa kelistik. Bul úshin mol perspektivaǵa jol ashatyn saiasi erik-jiger men saýda-ekonomikalyq áleýet jetkilikti. Eki el arasyndaǵy dostyqty nyǵaitýǵa airyqsha úles qosqanyńyzdy atap ótkim keledi",– dedi Memleket basshysy.
Vetnam Kommýnistik partiiasy Ortalyq komitetiniń Bas hatshysy Qazaqstannyń eń joǵary memlekettik nagradasyn tapsyrǵany úshin Qasym-Jomart Toqaev pen qazaq halqyna alǵys aitty.
