Memleket basshysy 1,5 jyldyń ishinde Ulttyq keńes múshelerimen 26 kezdesý ótkizdi. Bul týraly Ulttyq qoǵamdyq senim keńesiniń 5-otyrysynda QR Prezidentiniń kómekshisi Erlan Qarin aitty, dep habarlaidy QazAqparat.
«Qazirgi ýaqytta Ulttyq keńes tarapynan qoǵam belsendileri, sarapshylar jáne memlekettik organdarmen ózara áreket etý, usynystar ázirleý jumystary óz jalǵasyp tabýda. Qazan aiynda ótken Ulttyq keńestiń 4-otyrysynda Memleket basshysy bergen tapsyrmalardy júzege asyrý boiynsha 21 tarmaqtan turatyn arnaýly is-sharalar jospary qabyldady. Berilgen tapsyrmalardyń tiisti túrde oryndalýy hatshylyq tarapynan baqylaýǵa alyndy. Oǵan qosa, Ulttyq keńes músheleri usynystarynyń negizinde ázirlengen tapsyrmalardyń ike asý barysy hatshylyqtyń erekshe nazarynda. Atap aitqanda, qańtar aiynyń basynda saiasi reformalardyń birinshi toptamasy aiasynda sońǵy zań qabyldanǵan bolatyn. Ol - ólim jazasynyń kúshin joiýǵa baǵyttalǵan «Azamattyq jáne saiasi quqyqtar týraly halyqaralyq paktige ekinshi fakýltativtik hattamany ratifikatsiialaý týraly» QR Zańy», - dedi Erlan Qarin.
Onyń aitýynsha,saiasi reformalardyń ekinshi toptamasy boiynsha qazirgi ýaqytta 5 zań jobasy, bir Prezident Jarǵysy ázirlenip otyr. Saiasi reformalardyń úshinshi toptamasy aiasynda aldaǵy ýaqyttyń ózinde úsh zań jobasyn ázirleý qarastyrylǵan. Olardyń ishinde saiasi partiialardyń Májiliske ótý shegin 7-den 5 paiyzǵa deiin tómendetý, saiasi biýletenderine «bárine qarsymen» degen jazýdy engizý jáne basqa da bastamalar Ulttyq keńes músheleriniń usynystaryn eskere otyryp ázirlendi.
«Budan bólek memlekettik organdar men Ulttyq keńes músheleri arasynda ózara áreket etý jumystary jalǵastyryldy. 2020 jyly onlain formatta Ulttyq keńes músheleri men ministrlik basshylarynyń 13 kezdesýi ótkizildi. Kezdesýler barysynda Ultyq keńes músheleri ministrlikterdiń jekelegen qyzmet salalary jumysyn odan ary jetildirý boiynsha óz usynystarymen bólisti. Usynylǵan máselelerdi odan ári birlesip pysyqtaý úshin keńestiń birqatar múshesi ministrlikter janyndaǵy jumys toptaryna shaqyryldy», - dedi ol.
Sonymen qatar ol biyl Memleket basshysynyń Ulttyq keńes músheleri qabyldaý tájiribesi de jalǵasqanyn aitty.
«Ulttyq keńes qurylǵannan beri 1,5 jyldyń ishinde mundai 26 kezdesý uiymdastyryldy. Bul kezdeýlerde aitylǵan máseleler men usynystar hatshylyqtyń tarapynan baqylaýǵa alynǵan. Ulttyq keńes qyzmetiniń nátijelerin qorytyndylaý jáne dialog alańyn tiimdi nasihattaý maqsatynda 2020 jyldyń qarasha aiynda Ulttyq keńes kz veb-saity iske qosyldy. Budan basqa Ulttyq keńes qurylǵan sátten bastap onyń Telegram, Instagram, Facebook áleýmettik jelilerinde akkaýnty jumys isteidi. Atalǵan jumystardyń barlyǵy ulttyq keńestiń tiimdi qyzmet etýine yqpal etedi jáne ary qarai da bulbaǵyttarda jumys júrgiziledi», - dedi Erlan Qarin.
