Foto: akorda.kz
Prezident Qasym-Jomart Toqaev Sherhan Murtaza atyndaǵy Halyqaralyq Taraz innovatsiialyq institýtynyń Stýdentter úiinde oqý ornynyń oqytýshylarymen jáne stýdenttermen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Institýt rektory Erbolat Saýryqov oqý ornynyń maman daiarlaý isindegi jetistikteri men aldaǵy damý josparyn tanystyrdy. 2019 jyly burynǵy «Taraz» qonaq úii rekonstrýktsiialandy, qaita jasaqtalǵan jataqhanada 500 stýdentke barlyq jaǵdai jasalǵan.
Qasym-Jomart Toqaev memlekettiń bilim salasyna airyqsha mán berip otyrǵanyn atap ótip, búginde bilim alamyn degen adamǵa múmkindik mol ekenin aitty.
– Elimizdiń bolashaǵy – jastar. Jańa býyn, jańa tolqyn ósip keledi. Bilim alý óte mańyzdy. Abaisha aitqanda, «tolyq adam» degenimiz – oiy ushqyr, zerek, bilimge qushtar adam. Ár nársede qanaǵat bolýy kerek. Biraq bilimge kelgende, qanaǵat bolmaýy kerek. Árdaiym izdený kerek. Elimizdiń bolashaqta damyp, kórkeigen elge ainalýy, aldymen, sizderge bailanysty. Biz sizderge senemiz, úlken úmit artamyz. Barshańyzǵa sáttilik tileimin! – dedi Memleket basshysy.
