Qazaqstan Prezidenti Qyrǵyz Respýblikasynyń Prezidenti Sooronbai Jeenbekovpen kezdesti, dep habarlaidy "Ult aqparat" Aqordaǵa silteme jasap.
Memleketter basshylarynyń resmi kezdesý rásiminen soń shaǵyn quramdaǵy kelissózder júrgizildi.
Nursultan Nazarbaev Qazaqstanǵa resmi saparmen kelýge shaqyrýyn qabyl alǵany úshin Sooronbai Jeenbekovke rizashylyq bildirip, Qyrǵyz Respýblikasy Prezidentiniń alǵashqy sapary eki el arasynda ornyqqan diplomatiialyq qarym-qatynastyń 25 jyldyǵymen tuspa-tus kelip otyrǵanyn atap ótti.
Memleket basshysy Qazaqstan men Qyrǵyzstan qarym-qatynastarynyń tarihi turǵydan dostyq sipaty bar ekenin aitty.
– Qazaqstan men Qyrǵyzstan – baýyrlas ári odaqtas memleketter. Bizdiń aramyzdaǵy barlyq salada syndarly jáne senimdi dialog ornaǵan, – dedi Qazaqstan Prezidenti.
Sooronbai Jeenbekov Nursultan Nazarbaevqa Qazaqstanǵa resmi saparmen kelýge múmkindik týǵyzǵany úshin jáne ótken sailaýdaǵy jeńisimen quttyqtaǵany úshin alǵys aitty.
– Meniń Qazaqstanǵa birinshi saparym qos mereitoi – elderimiz arasyndaǵy diplomatiialyq qarym-qatynastardyń 25 jyldyǵy men Máńgilik dostyq týraly shartqa qol qoiylýynyń 20 jyldyǵy qarsańynda ótýde. Bizdiń tarihymyz da, tilimiz de, dinimiz ben mádenietimiz de bir, – dedi Qyrǵyzstan Prezidenti.
Memleketter basshylary kezdesý sońynda búgingi kelissózder men olardyń qorytyndysy boiynsha qol qoiylǵan qujattar ekijaqty qarym-qatynastardy odan ári nyǵaitýǵa septigin tigizetinine senim bildirdi.
