Nursultan Nazarbaev Shymkent qalasynyń ákimi Ǵabidolla Ábdirahymovty qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Ǵ.Ábdirahymov Shymkentke respýblikalyq mańyzy bar qala mártebesin berý týraly sheshim qabyldaǵany úshin Memleket basshysyna alǵys aityp, 2018 jyldyń qorytyndysy boiynsha barlyq makroekonomikalyq kórsetkishterdiń jaqsy ekenin atap ótti.
– Ótken jyly 17 myńnan astam jańa jumys orny ashyldy. Ortasha jalaqy mólsheri 6,6 paiyzǵa ósip, 113 700 teńgege jetti. Al, jan basyna shaqqandaǵy ortasha kiris kólemi 19 paiyzǵa artyp, 60 427 teńgeni qurady. Sizdiń tapsyrmalaryńyzdy oryndaý maqsatymen turǵyndar úshin jylýdyń tarifi 19 paiyzǵa, sýdyń tarifi 10 paiyzǵa, gazdyń tarifi 5,8 paiyzǵa jáne elektr qýatynyń tarifi 6,8 paiyzǵa tómendetildi, – dedi qala ákimi.
Qazaqstan Prezidenti berilgen málimettermen tanysqan soń, óńir ákimderi halyqty áleýmettik turǵydan qorǵaý, bilim berý, densaýlyq saqtaý, kommýnaldyq qyzmetterdiń tarifterin retteý, joldardyń sapasy, aýlalardy abattandyrý, kóshelerdi jaryqtandyrý, qoǵamdyq qaýipsizdik, aýyz sýmen jáne elektr energiiasymen qamtamasyz etý, sondai-aq qoǵamdyq kólik pen kommýnaldyq qyzmet kórsetý mekemeleriniń jumystary jónindegi máselelerdi árdaiym baqylaýda ustaý kerektigin aitty.
Memleket basshysy bul máseleler Qazaqstan Prezidenti Ákimshiliginiń erekshe baqylaýynda ekenin atap ótti.
