Memleket basshysy Qasym-Jomart Toqaev Úkimet qorynan dári-dármek, test júielerin jáne zerthanaǵa arnalǵan jabdyqtardy alý úshin qarajat bólingenin málim etti, dep habarlaidy "Ult aqparat".
«Oiyn-saýyq ortalyqtary, kinoteatrlar men teatrlar, kórmeler men halyq kóp baratyn basqa oryndar ýaqytsha jabylady. Oqýshylar demalysqa jiberildi. Stýdentter qashyqtan oqytý júiesine kóshti. Sondai-aq azamattarymyz otbasylyq is-sharalardy ótkizbegeni jón dep sanaimyn. Qazaqstan aýmaǵyna kirýge jáne shyǵýǵa shekteý qoiylady. Memlekettik shekara boiyndaǵy ótkizý beketterinde, vokzaldar men áýejailarda sanitarlyq rejim kúsheitildi. Meniń tapsyrmam boiynsha Úkimet qorynan dári-dármek, test júielerin jáne zerthanaǵa arnalǵan jabdyqtardy alý úshin qarajat bólindi. Aýrýhanalarda oryn jetkilikti. Osy sharalardyń bári de - azamattardyń densaýlyǵy úshin jasalyp otyrǵan óte mańyzdy qadamdar», - dedi Memleket basshysy qazaqstandyqtarǵa joldaǵan úndeýinde.
Prezident óz sózinde "saqtanǵandy Qudai saqtaitynyn" basa aitty.
Esterińizge sala ketsek, QR Prezidentiniń Jarlyǵymen Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty azamattardyń ómiri men densaýlyǵyn qorǵaý maqsatynda Qazaqstan Respýblikasynyń barlyq aýmaǵynda 2020 jylǵy 16 naýryz 08 saǵat 00 minýt pen 2020 jylǵy 15 sáýir 07 saǵat 00 minýt aralyǵynda tótenshe jaǵdai engizildi.
