Memleket basshysy Qasym-Jomart Toqaev Resei Federatsiiasynyń Qazaqstandaǵy elshisi Aleksei Borodavkindi qabyldady, dep habarlaidy Aqorda.
Kezdesý barysynda Qazaqstan men Resei arasyndaǵy jan-jaqty strategiialyq seriktestiktiń qazirgi ahýaly men perspektivalary talqylandy. Saýda-ekonomikalyq, investitsiialyq jáne mádeni-gýmanitarlyq yntymaqtastyqty damytýǵa erekshe mán berildi.
Qazaqstan Prezidenti koronavirýs pandemiiasy kezindegi yqpaldastyqty ekijaqty formatta, sondai-aq, Eýraziialyq ekonomikalyq odaq aiasynda odan ári nyǵaitýdyń mańyzdylyǵyn atap ótti.
Taraptar biylǵy qarasha aiyna josparlanǵan óńiraralyq yntymaqtastyqtyń XVII forýmyna daiyndyq barysyn qarastyrdy. Memleket basshysy atalǵan is-sharanyń sapaly ári mazmundy bolýyn qamtamasyz etý qajettigine nazar aýdardy.
Sonymen qatar kezdesýde óńirlik jáne halyqaralyq kún tártibindegi ózekti máseleler talqylandy.
