Otandyq BAQ ókilderine suhbat bergen Qazaqstan Prezidenti Nursultan Nazarbaev 2018 jyly Reseide ótetin prezidenttik sailaýǵa qatysty pikir bildirdi, dep habarlaidy QazAqparat.
Elbasy Resei Qazaqstannyń jaqyn kórshisi ekenine, eki eldiń arasynda tyǵyz bailanystar ornaǵanyna toqtala kele: «Sondyqtan da osy qarym-qatynastardy saqtaýǵa múddelimiz. Osy oraida bul jaqyn bailanystardy eskere otyryp, reseilik áriptestermen ózara keńes berip nemese keńes alyp júretin kezder bolady. Iaǵni, ortaq maqsattarǵa qatysty sheshim shyǵaramyz», - dedi.
Sonymen qatar, Memleket basshysy RF Prezidenti Vladimir Pýtinniń 2018 jyly jańa prezidenttik merzimge sailaýǵa túsýine qatysty pikir bildirdi.
«Bul qalypty sailaý protsesi. Vladimir Pýtin RF prezidenti sailaýyna qatysatyndyǵyn jariialady. Men oǵan sáttilik tileimin. Barlyq málimetter boiynsha ol jeńiske úmitker dep sanaimyn jáne bul durys. Qazirgi qiyn kezeńde, iaǵni Resei osyndai qysymǵa túsip jatqan ýaqytta Pýtin memleket qairatkeri ári Prezident retinde osynyń barlyǵyna tótep berýde, sondai-aq halqyn alǵa jetelep keledi», - dedi Nursultan Nazarbaev.
Eske sala ketsek, Vladimir Pýtinniń ókilettik merzimi 2018 jyly aiaqtalady.
Aita keteiik, 22 jeltoqsan kúni Elbasy Nursultan Nazarbaev elimizdegi jetekshi BAQ ókilderine 2017 jyldy qorytyndylaýǵa arnalǵan suhbat berdi. Onda qazaq qoǵamyndaǵy eleýli ózgerister men ózekti máseleler týraly jýrnalister suraǵyna jaýap berdi. Atalmysh suhbattyń televiziialyq nusqasy 25 jeltoqsanda respýblikalyq telearnalardyń efirinen kórsetildi.
