Biz reformalardy bireýge unaý úshin, olardyń aldynda jaqsy kóriný úshin, ne bolmasa bireýlerge esep berý úshin júrgizip otyrǵanymyz joq. Bul týraly Ulttyq qoǵamdyq senim keńesiniń besinshi otyrysynda QR Prezidenti Qasym-Jomart Toqaev málim etti, dep habarlaidy "Ult aqparat".
«Meniń birqatar sheteldik áriptesterim jáne bedeldi sarapshylar elimizde júzege asyrylyp jatqan saiasi reformalar týraly oń pikir aitýda. Olar saiasi jańǵyrýdyń san qyrly jáne kúrdeli úderis ekenin óte jaqsy túsinedi. Al, reformalardy synaityndar kóbinese máselege ústirt qaraidy nemese jaǵdaiymyzdyń ereksheligin ádeii túsingisi kelmeidi. Biz túitkildi tustarymyzdy jaqsy bilemiz. Ustanymymyz - aiqyn. Barlyq máselelerdi keń aýqymdy dialog pen mámle arqyly birtindep sheshemiz», - dedi Memleket basshysy.
Osy oraida Prezident saiasi jańǵyrý mindetti túrde júzege asyrylatynyn aitty.
«Bul - bizdiń uzaq merzimge arnalǵan negizgi maqsattarymyzdyń biri. Men osy máselelerge airyqsha mán berip otyrmyn. Biz reformalardy bireýge unaý úshin, olardyń aldynda jaqsy kóriný úshin, ne bolmasa bireýlerge esep berý úshin júrgizip otyrǵanymyz joq. Reformalardy eshkimge jaltaqtamai, udaiy iske asyratyn bolamyz. Basty maqsat – elimizdiń kúsh-qýatyn, áleýetin nyǵaitý jáne eń aldymen, halqymyz ál-aýqatyn arttyrý úshin tiimdi sheshimder qabyldaý. Buǵan eshkimniń kúmáni bolmaýy tiis», - dedi Toqaev.
