Foto: Aqorda
Prezident aviahabtardy damytý kólik-tasymal salasyndaǵy basym baǵyttardyń biri sanalatynyna toqtaldy, dep habarlaidy Ult.kz.
– Kúlli álem elderi tranzittik múmkindikterin arttyrýǵa erekshe mán berip otyr. Halyqaralyq básekelestik kúsheie tústi. Qazir Qazaqstan arqyly jóneltiletin júk, negizinen, avtomobil jáne temirjol arqyly tasymaldanady. Biraq sarapshylar jyl ótken saiyn áýe joldary arqyly ótetin júk tasymaly, iaǵni «air cargo»-nyń úlesi arta túsedi degen boljam jasaýda. 2040 jylǵa qarai áýe júkteriniń 20 paiyzy «Aziia – Eýropa» baǵytyna tiesili bolmaq. Elimiz temirjoldy, avtokólik jolyn jáne áýe tasymalyn qamtityn mýltimodaldi logistika júiesin qalyptastyrýy kerek, – dedi Memleket basshysy.
Qasym-Jomart Toqaev elimizdiń geografiialyq artyqshylyqtaryn tiimdi paidalaný qajet ekenin aitty.
– Elimiz Eýropa men Aziia arasyndaǵy negizgi áýe joldarynyń túiisken tusynda ornalasqan. Biz osy ereksheligimizdi barynsha tiimdi ári utymdy paidalanýymyz kerek. Ortalyq Aziia jáne Ońtústik Kavkaz aimaǵynda tranzittik júk tasymalyna bailanysty báseke kúsheiip barady. Sondai-aq kólik-logistika salasyna investitsiia tartýǵa qatysty talas qyza tústi. Biz de batyl ári tiimdi sheshimder qabyldaýymyz kerek. Áitpese qolda turǵan múmkindik pen artyqshylyqtan aiyrylyp qalýymyz múmkin, – dedi Prezident.
Memleket basshysynyń pikirinshe, negizgi áýejailarda tolyqqandy aviahab qalyptastyrý óte ózekti másele.
– Ár áýejaidyń básekege qabiletti tustaryn aiqyndap, jumys tásilin túbegeili ózgertý kerek. Qazir tranzittik kargo-trafiktiń qosymsha quny tómen bolyp tur. Júk tasymaldaýshylar kóbine janarmai quiý nemese tehnikalyq qajettilik úshin ǵana toqtaidy. Bizdiń áýejailar júkti tiep-jóneltýge, jinaqtaýǵa asa qulyqty emes. Sebebi elimizde infraqurylym daiyn emes. Sonyń saldarynan tranzittik áleýetimizdi tolyq paidalana almai otyrmyz. Osyǵan orai arnaiy ekonomikalyq aimaqtardyń tiimdi jumysyn qamtamasyz etýimiz kerek. Usynylatyn jeńildikter árbir habtyń ereksheligine qarai jasalýǵa tiis, – dedi Qasym-Jomart Toqaev.
