Memleket basshysy Nur-Sultan qalasynyń aktivimen kezdesti, dep habarlaidy "Ult aqparat" Aqordaǵa silteme jasap.
Kezdesýge deiin Qasym-Jomart Toqaev qalalyq Máslihattyń kezekten tys otyrysynda depýtattarǵa Nur-Sultan qalasynyń ákimi laýazymyna Altai Kólginovtiń kandidatýrasyn usynyp, olardyń kelisimin aldy.
Qazaqstan Prezidenti shahar aktivimen kezdesýde buǵan deiingi Nur-Sultan qalasynyń ákimi Baqyt Sultanovtyń atqarǵan jumysyna joǵary baǵa berdi.
– Qazaqstan Respýblikasynyń Konstitýtsiiasyna sáikes, qala ákimi Baqyt Sultanovty qyzmetinen bosatý jóninde sheshim qabyldadym. Aldymen Baqyt Turlyhanulyna osyndai tarihi ári jaýapty kezeńde ózine artylǵan senimdi aqtap, tapsyrylǵan mindetti abyroimen atqarǵany úshin rizashylyǵymdy bildiremin, – dedi Memleket basshysy.
Qasym-Jomart Toqaev qalanyń jańa ákiminiń aldynda mańyzdy mindetter turǵanyn atap ótti.
– Nur-Sultan qalasynyń ákimi bolyp Altai Kólginov taǵaiyndaldy. Ol uiymdastyrýshylyq qabileti men biliktiligi joǵary jas maman. Batys Qazaqstan oblysynda birneshe jyl tabysty eńbek etip, jergilikti halyqtyń aldynda zor bedelge ie boldy. Onyń bilimi men tájiribesin eskere otyryp, Nur-Sultan qalasynyń ákimi qyzmetine taǵaiyndaý týraly sheshim qabyldadym, – dedi Memleket basshysy.
Qazaqstan Prezidenti halyqtyń ómir súrý sapasyn arttyrý máselesine egjei-tegjeili toqtaldy.
– Azamattardyń ál-aýqatyn arttyrýǵa basa mán beriletin bolady. Jaqyn kúnderi turǵyndardyń áleýmettik máselelerin sheshýge baǵyttalǵan mańyzdy sheshim qabaldanady. Bul úderisterden astanamyz qalys qalmaýy kerek. Kerisinshe, áleýmettik máselelerdi sheshý isinde aldyńǵy qatarda júrýi qajet, – dedi Qasym-Jomart Toqaev.
Jiyn sońynda Memleket basshysy jańa ákimge birqatar naqty tapsyrma berdi.
