Memleket basshysy Qasym-Jomart Toqaev Respýblikalyq biýdjettiń atqarylýyn baqylaý jónindegi esep komitetiniń tóraǵasy Natalia Godýnovany qabyldady, dep habarlaidy Aqorda.
Qasym-Jomart Toqaevqa agroónerkásip keshenin qoldaýǵa bólingen daǵdarysqa qarsy qarjynyń jumsalýyna júrgizilgen tekserý jumystarynyń aldyn ala nátijeleri jáne «Jumyspen qamtýdyń 2020-2021 jyldarǵa arnalǵan jol kartasy» baǵdarlamasynyń júzege asyrylýy týraly esep berildi.
Qazaqstan Prezidentine ekonomikany qoldaýǵa jáne pandemiiamen kúreske baǵyttalǵan qarajattyń Esep komiteti men tekserý komissiialarynyń qatań baqylaýynda ekeni aityldy. Aldyn ala qorytyndylar boiynsha 940 milliard teńgege jýyq qarjynyń jumsalýy tekserilgen. Qazirdiń ózinde qarajattyń tiimsiz josparlanýyna jáne jumsalýyna qatysty birqatar qarjylyq zań buzýshylyq derekteri anyqtalǵan.
Esep komitetiniń tóraǵasy Memleket basshysyna ekonomikany jáne halyqtyń áleýmettik turǵydan osal toptaryn qoldaýǵa baǵyttalǵan qarjyny tekserý jumystarynyń qorytyndy nátijeleri biylǵy jeltoqsan aiynda Prezidentke usynylatynyn habarlady.
Sonymen qatar Qasym-Jomart Toqaev 2021-2023 jyldarǵa arnalǵan respýblikalyq biýdjet jobasyn baǵalaý qorytyndysymen tanysty.
Memleket basshysyna kvazimemlekettik sektor qyzmetiniń tiimdiligine júrgizilgen aýditorlyq jumystardyń jalǵasatyny, sondai-aq, «Nurly jer» turǵyn úi qurylysy memlekettik baǵdarlamasynyń júzege asyrylýyna júrgizilgen tekserý jumystarynyń qorytyndylary týraly aqparat berildi.
Kezdesý sońynda Qasym-Jomart Toqaev Natalia Godýnovaǵa birqatar naqty tapsyrma berdi.
