Memleket basshysy munai-gaz salasyn damytý máseleleri jóninde keńeitilgen keńes ótkizdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev óz sózinde otyn-energetika kesheniniń Qazaqstan ekonomikasynda úlken ról atqaratynyn aitty. Prezident munai-gaz salasyn odan ári damytýdyń mańyzdylyǵyn atap ótip, Úkimet pen jergilikti atqarýshy organdardyń aldyna birqatar naqty mindetterdi qoidy.
Memleket basshysy Qashaǵan, Teńiz jáne Qarashyǵanaq siiaqty ken oryndaryna qatysty aýqymdy jobalardy odan ári júzege asyrý qajettigine toqtaldy. Qasym-Jomart Toqaev Qashaǵandaǵy munai óndirý deńgeiin júieli negizde arttyrý maqsatynda Úkimetke Konsortsiýmnyń merdiger kompaniialarymen birlesip, Qashaǵan ken ornyn tolyqqandy igerýdiń Jol kartasyn kelisýdi tapsyrdy.
Prezident elimizdiń batystaǵy ken oryndarynan respýblikanyń ózge óńirlerine munai tasymaldaý máselesine arnaiy toqtaldy. Ol «Keńqiiaq-Qumkól» munai qubyryn salý jumystaryn jyl sońyna deiin aiaqtaýdy tapsyrdy. Sonymen qatar Memleket basshysy otandyq naryqqa jetkiziletin munaidyń azaiý múmkindigine bailanysty alańdaýshylyq bildirdi.
- Ishki naryqty munaimen qamtamasyz etý negizinen Aqtóbe jáne Qyzylorda oblystarynyń ken oryndary esebinen júzege asyrylyp otyr. Osy jaǵdaidy eskersek, otandyq munai óńdeý zaýyttarynda óńdeletin munai kóleminiń tómendeý qaýpi bar. Resýrstarymyzdy barynsha tiimdi jáne utymdy paidalaný maqsatynda Úkimet osy máseleni pysyqtap, naqty usynystar engizýi qajet, – dedi Prezident.
Qasym-Jomart Toqaev munai-gaz himiia salasynyń damýy ekonomikany jańǵyrtýdyń mańyzdy baǵyty ekenin atady.
– Munai-gaz himiia salasy ekonomikanyń basqa salalaryna mýltiplikativti yqpal etedi. Álemde munai-gaz himiia salasyndaǵy kómirsýtek shikizatynyń qoldanylý úlesi 34%, al Qazaqstanda óte az. Polipropilen men polietilen óndirý jónindegi jobalardyń iske asyrylýy jalpy ishki ónimniń jyldyq ósimin ortasha eseppen 1,5 paiyzǵa jetkizýge múmkindik berer edi, – dep sanaidy Memleket basshysy.
Qazaqstan Prezidenti gaz salasyn damytýdyń basymdyǵyn arnaiy atap ótip, gaz qubyry júiesin damytý isinde jaqsy nátijeler bar ekenin aitty. Bul rette, ol Úkimettiń nazaryn halyqty gazben qamtamasyz etý qajettigine aýdardy.
– Elimizdi gazben qamtý deńgeii 50 paiyzdy quraidy. Bul – 9 million halyq degen sóz. «Saryarqa» magistraldy gaz qubyry qurylysynyń jobasyn iske asyrý nátijesinde elimizdiń qosymsha 2,7 million halqy gazben qamtamasyz etiledi, – dedi Qasym-Jomart Toqaev.
Prezident Qazaqstandaǵy geologiialyq barlaý máselesine de toqtaldy. Onyń aitýynsha geologiialyq barlaý jumystaryn kúsheitý arqyly mineraldy shikizat qoryn sapaly tolyqtyrý kerek.
– Biz osy saladaǵy zańnamany jetildirdik. Endi osy baǵytta naqty qadamdar jasaý kerek. Úkimetke 2020 jyldyń 1 naýryzyna deiin álemdegi mineraldyq-shikizat resýrstaryna suranystyń uzaq merzimdi boljamyn eskere otyryp, geologiialyq barlaý baǵdarlamasyn ázirleýdi tapsyramyn, – dedi Memleket basshysy.
Qasym-Jomart Toqaev munai servisiniń indýstriiasy ekonomikany ártaraptandyrý jáne ósý draiverleriniń biri bolyp tabylady. Memleket basshysy bul máselede munai servisterinen túsetin tabystyń kómirsýtegi eksporty tabysynan asyp túsetin Norvegiianyń tájiribesin basshylyqqa alýdy usyndy.
– Munai men gaz óndirýdi arttyra otyryp, biz zamanaýi munai servisi klasterin qurýǵa tiispiz. Munai servisi otandyq shaǵyn jáne orta biznesti damytýǵa, ónimdi jumys oryndaryn ashýǵa, qosymsha quny joǵary óndiristerdi oqshaýlaýǵa aitarlyqtai serpin beredi, – dedi Memleket basshysy.
Sonymen qatar Prezident ekologiiany qorǵaý jáne tabiǵi resýrstardy tiimdi paidalaný máseleleriniń mańyzdylyǵyn atap ótti. Qasym-Jomart Toqaevtyń pikirinshe, zamanaýi tehnologiialardy paidalaný jáne eskirgen jabdyqtardy jańartý, zattardyń shyǵarylatyn zattardy qysqartý, munai men gazdyń aǵyp ketýiniń aldyn alý qajet. Memleket basshysy bul jumystar boiynsha munai-gaz kompaniialarynyń aqparattyq ashyqtyǵyn jáne olardyń ekologiialyq jaýapkershiligin arttyrý basty basymdyqqa ie bolatynyn atap ótti.
Keńeitilgen keńes barysynda Energetika ministri Qanat Bozymbaev, ekologiia, geologiia jáne tabiǵi resýrstar ministri Maǵzum Myrzaǵaliev, «Samuryq-Qazyna «UÁQ» AQ Basqarma Tóraǵasy Ahmetjan Esimov, «Lýkoil» AAQ Resei munai-gaz kompaniiasynyń prezidenti Vagit Alekperov, sondai-aq «Teńizshevroil», «NCOC» jáne «Qarashyǵanaq Petroleým Opereiting» kompaniialarynyń basshylary baiandama jasady.
