Qazaqstan Prezidenti Qarjy naryǵyn retteý jáne damytý agenttiginiń tóraǵasy Mádina Ábilqasymovany qabyldady, dep habarlaidy "Ult aqparat" Aqordaǵa silteme jasap.
Memleket basshysyna qarjy naryǵynyń damý qorytyndylary men qarjy uiymdaryn retteý jónindegi jumystar týraly baiandaldy.
Kezdesý barysynda qarjy turaqtylyǵyn qamtamasyz etýge baǵyttalǵan sharalarǵa erekshe nazar aýdaryldy. Atap aitqanda bank, saqtandyrý sektory, qor naryqtary boiynsha turaqty túrde AQR jáne strestik synaqtan ótkizýdi kózdeitin qadaǵalaý saiasatynyń basymdyqtary ázirlengen.
Qasym-Jomart Toqaevqa strestik aktivter deńgeiin tómendetý jónindegi qadaǵalaý josparyn bankterdiń oryndaýyna baqylaý jasaý maqsatynda Agenttiktiń qabyldap jatqan sharalary týraly málimet berildi. Sonyń nátijesinde ótken jarty jylda strestik aktivterdiń kólemi 15,5 paiyzǵa, iaǵni 2,3 trillion teńgege deiin azaidy.
Mádina Ábilqasymovanyń aitýynsha, qazirgi ekonomikalyq jaǵdaida bankterdiń nesie berý isi ornyqty bolyp otyr. Ekonomikany nesieleý kólemi jyl basynan beri 3,3 paiyzǵa artyp, 15,1 trillion teńgege jetken.
Memleket basshysy qaryz alýshylardyń quqyǵyn qorǵaý maqsatymen 25 mamyrda bankter men mikroqarjy uiymdary úshin azamattardyń merzimi ótken bereshegin retteýdiń mindetti tártibin engizýdi kózdeitin zańǵa qol qoidy.
Prezidenttiń tapsyrmasy boiynsha jyldyq tiimdi syiaqy mólsherlemesi saralanyp, kepildik jáne ipotekalyq kreditter boiynsha shekti mólsher tómendetildi. Jaǵymsyz nesielik tarihy bar boryshkerlerdiń nesiege qoljetimdiligin qalpyna keltirý úshin merzimi ótken nesieni ótegen qaryz alýshylardy ońaltý tetigi qabyldandy. Búginde 1,4 million adam qaitadan qaryz alý quqyǵyna ie boldy.
Agenttik tóraǵasy Memleket basshysyna mikroqarjylyq qyzmetti litsenziialaý aiaqtalǵany týraly baiandady. Jyl basynan beri 1012 nesie berý uiymy litsenziia alǵan.
Agenttik tóraǵasy Prezidentke shaǵyn nesielerdi berý kezinde klientterdiń málimetterin qashyqtan sáikestendirý tetigi kúsheitilgenin jetkizdi. Bul rette, mindetti túrde biometriiany tekserý nemese eki faktorly aýtentifikattaý arqyly ótkiziledi. Budan bylai klientterdi teksermesten shaǵyn nesielerdi berýge tyiym salynady.
Kezdesý qorytyndysy boiynsha Memleket basshysy Agenttikke ekonomikalyq ósimdi qaita qalpyna keltirýde qarjy turaqtylyǵyn saqtaý, qarjy qyzmetteri tutynýshylarynyń quqyqtaryn qorǵaýdy kúsheitý jáne qarjy naryǵynyń rólin arttyrý jóninde birqatar mindet júktedi.
