Astana LRT qurylysynyń birinshi kezeńin aiaqtaýdyń naqty merzimin aiqyndaý kerek. Bul týraly Nur-Sultan qalasynyń ákimdiginde ótip jatqan elordany odan ary damytý máseleleri jónindegi májiliste Memleket basshysy Qasym-Jomart Toqaev aitty, dep habarlaidy QazAqparat.
«LRT uzaqtyǵy 22,5 shaqyrymdy quraidy, 18 stansa josparlanǵan. Tyńdańyzdarshy, sizder marafon jarysynda 22 shaqyrymnan da kóp júgiresizder. 18 stansa, demek joldyń bir bóligi bir shaqyrymnan sál ǵana asady. Biz jaiaý odan da kóp júremiz», - dedi Memleket basshysy.
Qazaqstan Prezidenti mundai jobanyń bastapqy kezden-aq maqsatqa sai bolmaǵandyǵyn atap ótti.
«Mundai jobany qalai júzege asyrýǵa ruqsat berilgendigin múldem túsinbeimin. Úkimet pen ákimdikke LRT birinshi kezeńin aiaqtaýdyń naqty merzimin, ekinshi kezeńin aiaqtaýdyń kestesi men tetikterin anyqtaýdy tapsyramyn. Amal joq», - dedi Q.Toqaev.
Sondai-aq, Prezident LRT qurylysy isin tergeýdi jedeldetýdi tapsyrdy.
«Sybailas jemqorlyqqa qarsy is-qimyl agenttigine tergeýdi jedeldeý tapsyrmasymen júgingim keledi. Bireýlerdiń shetelge qashyp ketkendigin aityp, ústimen júrýge bolmaidy. Bul josparlanǵan qashyp ketý ekendigi túsinikti. Ózgelerdi, onyń ishinde sheshim qabyldaǵan ákimdiktiń basshylaryn qaperden tys qaldyrmaý kerek», - dedi Memleket basshysy.
Qazaqstan Prezidenti tipti ol LRT kompaniiasynyń basshysy bolsa da bir ǵana oryndaýshyǵa ǵana nazar aýdarylatyn problema emestigin basa aitty.
«Máselen, sheshimdi ákimdik qabyldady. Tereńirek tekserińizder, bul - óte daýly joba, ekonomikalyq turǵyda túsiniksiz. Árine, Úkimet pen ákimdiktiń qol qolaýymen ony júzege asyrýǵa týra keledi. Sebebi halyqaralyq mindette bar. Bul problemanyń mán-jaiyn anyqtaiyq», - dedi Q.Toqaev.
Eske salsaq, Prezident LRT qurylysyn jedeldetýdi tapsyrdy. Buǵan deiin LRT-nyń qurylysy ýaqytsha toqtatylǵany týraly habarlaǵan bolatynbyz.
