Memleket basshysy Qasym-Jomart Toqaevtyń Ulttyq qoǵamdyq senim keńesinde kótergen máseleler zaman talaby dese bolady. Bul pikirdi saiasattanýshy Aidos Sarym bildirdi, dep habarlaidy QazAqparat.
«Memleket basshysynyń málimdemesi qazirgi jaǵdaiǵa, ásirese karantindik jáne tótenshe jaǵdailarǵa bailanysty talaptarǵa sai keledi. Kórip otyrǵanymyzdai, bizdiń kóptegen mekemelerimiz koronavirýs siiaqty indetten saqtanýǵa daiyn emes. Sondyqtan bárin qolmen jasaýǵa týra keldi. Keshegi Ulttyq qoǵamdyq senim keńesinde Qasym-Jomart Toqaev bergen tapsyrma da, oǵan deiin aitqany da tiisti strategiialyq qańqany qurý úshin qajet boldy. Bul sharalardyń barlyǵy jańa mindetterdi sheshýge arnalǵan», - deidi saiasattanýshy.
Ol koronavirýstyń álemniń tynys-tirshiligin tejep, ádettegi ómir saltyn buzǵanyn aitty.
«Biz bir ǵana virýstyń álemdegi qimyl-qozǵalysty tejep, dástúrli ómir saltyn buzyp jibere alatynyna kóz jetkizdik. Endi meditsinalyq ǵylymǵa barynsha den qoiýymyz kerek. Memleket basshysy bul týraly da aitqan edi. Sondai-aq kadr daiyndaýmen ainalysý kerek. Pandemiia kezinde kórip otyrǵanymyzdai, árbir memleket eń aldymen ózine, óziniń halqyna qamqor bolyp otyr. Ár memleket óz ekonomikasyna jumys istep jatyr. Sondyqtan biz de ótken-ketkenimizdi baǵamdap, qazirgi ýaqytta bizge ne kerek, bes, on, otyz jyldan keiin bizdi ne kútip turýy múmkin ekenin túsinip alýymyz qajet. Saiasatymyzdy meditsina jáne basqa da salalarǵa beiimdeýimiz kerek», - deidi Aidos Sarym.
