Memleket basshysy Qasym-Jomart Toqaev Qostanai oblysynyń ákimi Arhimed Muhambetovpen telefon arqyly sóilesti, dep habarlaidy "Ult aqparat" Qostanai oblysy ákiminiń baspasóz qyzmetine silteme jasap.
Oblys basshysy QR Prezidentine koronavirýsqa qarsy kúres, óńirdegi sanitarlyq-epidemiologiialyq jaǵdai jáne karantindik sharalardy iske asyrý barysyn baiandady. Sondai-aq, azamattarǵa áleýmettik kómek kórsetý, ShOB-tyń jumys rejimine birtindep shyǵýyn qamtamasyz etý, egis jumystary jáne «Jumyspen qamtýdyń Jol kartasyn» iske asyrý boiynsha Prezident tapsyrmalaryn iske asyrý barysy jaiynda esep berdi.
Búginde óńirde koronavirýstyq infektsiiany juqtyrýdyń 7 jaǵdaiy tirkelgen, 1 adam qaza tapty. Qostanai oblysynda infektsiianyń aldyn alý maqsatynda 1 228 meditsinalyq tósek-oryn jabdyqtalǵan.
«Aldyn ala bekitilgen algoritmge sáikes koronavirýstyq infektsiianyń bar-joǵyna 3376 zertteý júrgizildi. Úi karantinine 1068 adam ornalastyryldy. Infektsiianyń odan ári taralýyna jol bermeý maqsatynda 17 sáýirde saǵat 00:00-den bastap Qostanai oblysynyń aýmaǵynda shekteý sharalaryn qataitý arqyly karantin rejimi engizildi. Karantin rejimin 29 blokpost, 33 mobildik patrýl jáne 300-den astam politsiia qyzmetkeri qamtamasyz etedi. Alǵashqy eki kún ishinde politsiia halyq arasynda karantindik sharalardy saqtaý jóninde túsindirý jumystaryn júrgizetin bolady. Sodan keiin TJ rejimin buzǵany úshin aiyppul sanktsiialaryn qoldana bastaidy. TJ rejimi bastalǵannan beri 408 quqyq buzýshy ákimshilik jaýapkershilikke tartyldy, onyń 40-y qamaýǵa alyndy. Qostanai oblysy kóktemgi egiske tolyq daiyn. Jaqyn kúnderi jer óńdeý, ylǵaldy jabý jumystary bastalady. Aýyl sharýashylyǵy qurylymdary tolyq kólemde (528 myń tonna) tuqymmen qamtamasyz etilgen. Kóktemgi egis jumystaryna 22,9 myń traktor, 1032 egis kesheni jumyldyrylmaq.Tehnika 100% daiyn. Oblys boiynsha 71 myń tonna arzandatylǵan JJM bólindi, jetkizý kestege sáikes júzege asyrylady», - dedi óńir basshysy telefon arqyly.
Oblysta Jumyspen qamtýdyń jol kartasy aiasynda infraqurylymdyq jobalardy iske asyrýǵa shamamen 54 mlrd teńge bólindi, 13 myńnan astam jumys orny qurylady.
Aimaq basshysynyń esebin tyńdaǵan Prezident oǵan birqatar naqty tapsyrmalar júktedi.
