Memleket basshysy Qasym-Jomart Toqaev Qostanai oblysyndaǵy balmuzdaq jáne ashytylǵan sút ónimderin óndiretin «Milh» jaýapkershiligi shekteýli seriktestiginiń óndirisimen tanysty, dep habarlaidy Aqorda.
Prezidentke pasterlengen sút óndirisi men qaita óńdeitin zamanaýi jabdyqtar kórsetildi. Kásiporyn táýligine 130-150 tonna sút óńdeýge qaýqarly.
Kásiporyn sút ónimderiniń 120-dan astam túrin shyǵarady, olardyń 30% Reseidiń shekaralas aimaqtaryna eksporttalady. Óndiriste 710 adam turaqty túrde jumys isteidi. Shikizatty oblystaǵy 12 myńnan astam jeke sharýa qojalyqtarynan satyp alynady.
Qasym-Jomart Toqaev kompaniianyń óndiris qarqynyn arttyrýdyń josparymen tanysyp, sapaly ári básekege qabiletti ónim shyǵarýǵa múmkindik beretin zamanaýi tehnologiialardy engizýdiń mańyzdylyǵyn atap ótti.
Prezident Qazaqstan halqyna arnaǵan Joldaýynda agroónerkásip keshenin damytýǵa qatysty birqatar mindetter qoiǵan bolatyn. Búgin kásipkerlerdi Joldaýdy júzege asyrýda belsendilik tanytýǵa shaqyrdy.
«Joldaýdyń ár sózin oi eleginen ótkizip otyryp, jumys istedim. Bul qujat meniń óz qalamymnan shyqty. Artyq aitylǵan eshteńe joq, bárin iske asyrýǵa bolady. Barlyq basshylardy, kásipkerlerdi Joldaýdy tolyq júzege asyrýǵa belsendi atsalysýǵa shaqyramyn», - dedi Qasym-Jomart Toqaev.
Prezident Jumyspen qamtýdyń jol kartasyn iske asyrýdyń da mańyzdy ekenin atap ótti.
«Jumyspen qamtýdyń jol kartasy memleket pen Úkimetke qoiylǵan mindetterdi júzege asyrý turǵysynan óte mańyzdy. Belgili sebepterge bailanysty sheshimin tappaǵan kóptegen mindetter, qazirgi ýaqytta, Jumyspen qamtýdyń jol kartasy arqyly oryndalýda. Turǵyn úi kommýnaldyq sharýashylyǵy da, áleýmettik infraqurylym máseleleri de sheshimin taýyp keledi», – dedi Prezident.
Memleket basshysy sóz sońynda kásiporyn basshylyǵyna qaiyrymdylyq jáne áleýmettik jobalardy iske asyrǵany úshin alǵys bildirdi. Kezdesýge qatysýshylar Prezident bastamasy boiynsha ótkizilip otyrǵan reformalarǵa qoldaý bildirip, Joldaýda aitylǵan maqsattarǵa qol jetkizýge belsendi atsalysýǵa daiyn ekenderin aitty.
