Qazaqstan Prezidenti Qasym-Jomart Toqaev Nur-Sultan qalasynda ótip jatqan «Ortalyq Aziia – Koreia Respýblikasy» forýmnyń 12-otyrysyna qatysýǵa kelgen Koreia Respýblikasynyń Syrtqy ister ministri Kan Gion Hvany qabyldady, dep habarlaidy "Ult aqparat".
Taraptar ekijaqty strategiialyq seriktestiktiń qazirgi ahýaly men perspektivasy, sondai-aq, joǵary deńgeide jasalǵan ýaǵdalastyqtardyń júzege asý barysy jaiynda pikir almasty.
Memleket basshysy Qazaqstan men Ońtústik Koreia arasyndaǵy saýda-investitsiialyq jáne tehnologiialyq qarym-qatynastardyń, sonymen qatar, mádeni-gýmanitarlyq bailanystardyń qarqyny joǵary ekenin atap ótti.
– Prezident Mýn Chje Inniń sáýir aiyndaǵy sapary óte jemisti boldy. Sapar barysynda qol qoiylǵan «Samal jel» baǵdarlamasy eki el arasyndaǵy yntymaqtastyqtyń damýyna tyń serpin beredi dep sanaimyz. Biz ekonomika jáne biznes salalary boiynsha yqpaldastyqty odan ári arttyra berýge niettimiz, – dedi Qasym-Jomart Toqaev.
Óz kezeginde ońtústik koreialyq diplomat óz eliniń Prezidenti Mýn Chje Inniń sálemin jetkizip, Qazaqstanmen seriktestikti ekijaqty, sondai-aq, óńirlik negizde de ári qarai damytýǵa daiyn ekenderin rastady.
– Kelesi jyly bizdiń elimizge jasaityn saparyńyzdy asyǵa kútemiz. Bizdiń Prezidentimizdiń Qazaqstanǵa jasaǵan saparynyń nátijesi óte jemisti boldy. Osy sapar aiasynda qol jetkizilgen ýaǵdalastyqtar ózara yqpaldastyqty odan ári nyǵaitýdyń naqty baǵyttaryn aiqyndady. Ony eki memlekettiń tiisti organdary sátti iske asyryp jatyr. Barlyq másele óz jolymen damýda. Sizdiń Ońtústik Koreiaǵa jasaityn saparyńyz yntymaqtastyǵymyzdyń jańa kókjiekterin ashady dep senemiz jáne ol úshin barlyq kúsh-jigerimizdi jumsaimyz, – dedi Kan Gion Hva.
