Prezident Qasym-Jomart Toqaev Úkimet músheleri men ákimderge azyq-túlik qaýipsizdigi týraly eske saldy, - dep habarlaidy "Ult aqparat" Aqordanyń baspasóz qyzmetine silteme jasap.
«Kelesi – baǵa belgileý máselesi. Bul másele boiynsha birneshe talqylaý boldy. Azyq-túlik baǵasyn ósirmeý úshin negizgi baǵyttar boiynsha naqty jumys júrgizý kerek. Ónimniń ózindik qunyn tómendetý, qajetsiz deldaldan arylý týraly biz birneshe ret aittyq. Saýda jelilerin qoljetimdi etip, ainalymǵa qarjy salý úshin arzan nesie berý tásilin de qoldanýǵa bolady. Bul baǵytta alǵashqy qadamdar jasaldy. Taýar óndirýshiden aldyn-ala tikelei satyp alý erejesi qabyldandy.
Biýdjetten qarjy bólinetin boldy. Degenmen kóptegen sharýanyń kókónis saqtaityn jeri joq. Sol sebepti olar ónimderin egis basynan tikelei satýǵa májbúr bolady. Onyń saldary bárimizge belgili. Aýyl turǵyndary biraz tabysynan qaǵylady. Azyq-túliktiń baǵasy jyl mezgiline qarai qatty ózgeredi. Kúzde sý tegin nárse kóktemde sharyqtap shyǵa keledi.
Munyń sheshimi bireý ǵana – qoima infraqurylymyn jasaý kerek. Biraq bul baǵyttaǵy jumys baiaý júrip jatyr» - dedi Memleket basshysy.
Prezidenttiń aitýynsha, byltyr 83 myń tonna ónim saqtaityn qoima salý josparlanǵanmen, onyń 64 myńy ǵana paidalanýǵa berilgen nemese jospar 77 paiyzǵa oryndalǵan.
«Biyl jumys birshama jandana tústi. 98 myń tonnalyq qoima salý josparlanyp, sonyń 87 myń tonnasy qazirdiń ózinde iske qosyldy. Degenmen bul baǵyttaǵy sharýany áli de shirata túsý kerek.
Búgingi tańda azyq-túlik qaýipsizdigi eldi órkendetýdiń basty sharty ekenin túsiný qajet. Agroónerkásip keshenin, ásirese aýyl sharýashylyǵy ónimin óńdeýdi damytý Úkimet pen ákimder úshin basty basymdyq bolýǵa tiis» - dedi Toqaev.
