Foto: Akorda.kz
Memleket basshysy Qasym-Jomart Toqaev «Kóne Taraz» tarihi-mádeni keshenindegi Jambyl óńiri qolóner sheberleriniń kórmesine bardy, dep habarlaidy "Ult aqparat" Aqordanyń resmi saityna silteme jasap.
Prezident «Sheber shańyraq» múmkindigi shekteýli jandar qoǵamdyq birlestigi, «Óshpes mura» Jambyl oblysy qolóner sheberleriniń qaýymdastyǵy, «Jambyl oblysy qolónershiler odaǵy» qoǵamdyq birlestigi, Asyl-Dizain» sán úii jáne basqa da uiymdar sheberleri jasaǵan buiymdardy tamashalady. Kórmege 29 qolóner sheberiniń aǵash, teri jáne kiizden jasaǵan buiymdary, qysh ydystar, panno, ulttyq mýzykalyq aspaptar, ulttyq kiim úlgileri, at ábzelderi, zergerlik buiymdar qoiylǵan.
Memleket basshysyna kórsetilgen «Kiiz úi» installiatsiiasynda jastarǵa toqyma, kiiz basý, quraq quraý, urshyq iirý, syrmaq syrý jáne basqa da óner túrleri boiynsha sheberlik sabaǵy ótkizildi.
Sonymen qatar kórmede kóshpendilerdiń zamanaýi álemdik úlgide jańǵyrtylyp, neo-folklor stilinde tigilgen kópǵasyrlyq dástúrli kiimderi jáne dala gúlderi men shópteriniń hosh iisterinen jasalǵan iissýlar kórsetildi.
Jýyrda Taraz Dúniejúzilik qolónershiler qalalary tizimine engeni týraly sertifikat aldy.
