QR Prezidenti Qasym-Jomart Toqaevtyń baspasóz hatshysy Berik Ýáli Facebook-tegi paraqshasynda Memleket basshysy qol qoiǵan zańdarǵa túsindirmeni jariialady, dep habarlaidy "Ult aqparat".
Búgin Memleket basshysy birqatar mańyzdy zańdarǵa qol qoidy.
Atap aitqanda:
1) «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna;
2) «Qazaqstan Respýblikasynyń keibir zańnamalyq aktilerine sailaý máseleleri boiynsha ózgerister men tolyqtyrýlar engizý týraly» Zańǵa.
Tómendegi túzetýler engizildi:
Aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderiniń sailaýyn engizý: «Aýdandyq mańyzy bar qalanyń, aýyldyń, kenttiń, aýyldyq okrýgtiń ákimin tiisti ákimshilik-aýmaqtyq birliktiń halqy jalpyǵa birdei, teń, tóte sailaý quqyǵy negizinde jasyryn daýys berý arqyly jiyrma bes jasqa tolǵan Qazaqstan Respýblikasynyń azamattary qatarynan tórt jyl merzimge laýazymǵa sailaidy».
Barlyq kandidattarǵa qarsy daýys berý: «Sailaý biýlletenine «Bárine qarsymyn» degen jol engiziledi;
Sailaýda saiasi partiialardyń Májiliske ótý shegi 7 paiyzdan 5 paiyzǵa deiin tómendetildi.
3) «Qazaqstan Respýblikasynyń keibir zańnamalyq aktilerine Qazaqstan Respýblikasynda banktik, mikroqarjylyq jáne kollektorlyq qyzmetti retteý máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańy.
Tómendegi túzetýler engizildi:
Kredittik biýrolarda kredit tarihtaryn saqtaý merzimin 10 jyldan 5 jylǵa deiin qysqartý: «Kredittik biýro kredittik tarih sýbektisine qatysty aqparattyń saqtalýyn ol týraly sońǵy aqparat alynǵan kúnnen keiin 5 jyl boiy qamtamasyz etedi».
Kollektorlarǵa bóten telefon nómirlerinen qońyraý shalýǵa tyiym salynady. Sondai-aq olar boryshkerlermen kez kelgen ózara árekettesý protsessiniń beine jáne aýdio jazbasyn júrgizýge mindetteledi.
4) «2021-2023 jyldarǵa arnalǵan respýblikalyq biýdjet týraly» Qazaqstan Respýblikasynyń Zańyna ózgerister men tolyqtyrýlar engizý týraly» Qazaqstan Respýblikasynyń Zańy.
Tómendegi túzetýler engizildi:
2021-2025 jyldarǵa arnalǵan makroekonomikalyq kórsetkishterdiń boljamyn naqtylaý maqsatynda ázirlendi;
Memleket basshysynyń Qazaqstan halqyna Joldaýynda belgilegen tapsyrmalardy, sondai-aq, koronavirýs indetine qarsy kúres sharalaryn iske asyrýǵa baǵyttalǵan.
