Memleket basshysy Qasym-Jomart Toqaev qańtar oqiǵasy kezinde qaitys bolǵan azamattardyń rýhyna meshitte quran baǵyshtaǵannan keiin halyqqa úndeý jasady, dep habarlaidy "Ult aqparat" Aqordaǵa silteme jasap.
***
Ardaqty aǵaiyn!
Biylǵy jyl elimiz úshin qaiǵyly oqiǵadan bastaldy. Halqymyz óte qiyn synaqty bastan ótkerdi. Memleketimizdiń tutastyǵyna, azamattarymyzdyń qaýipsizdigine, elimizdiń bolashaǵyna qaýip tóndi. Biz lańkesterge der kezinde toitarys berip, betin qaitardyq. Ókinishke qarai, dúrbeleńde kóptegen azamatymyz qaza tapty. Bul – naǵyz qasiret.
Qazirgi tańda tiisti mekemeler azamattardyń árbir isi boiynsha tergeý jumystaryn júrgizip jatyr. Adam quqyǵyn qorǵaý máselesi men úshin asa mańyzdy. Qaiǵyly jaǵdai búkil eldiń qabyrǵasyn qaiystyrdy. Osyǵan bailanysty Jalpyulttyq aza tutý kúnin jariialadyq.
Sol qasiretti oqiǵadan beri 40 kún ótti. Búgin marqumdardyń rýhyna quran baǵyshtaý úshin meshitke arnaiy keldim. Qaza bolǵan adamdardyń jaqyndaryna taǵy da kóńil aitamyn.
Memleket qaraly shańyraqtardy qaraýsyz qaldyrmaidy. Men qaitys bolǵan azamattardyń otbasylaryna qarjylai kómek kórsetýdi tapsyrdym. «Qazaqstan halqyna» qory da osy qaiyrymdylyq jumysqa atsalysady dep oilaimyn.
Endi halqymyzdyń bereke-birligi men tynyshtyǵyn buzýǵa jol bermeimiz. Bul – biliktiń ǵana emes, barsha azamattarymyzdyń ortaq boryshy. Mundai qasiret eshqashan bolmasyn! Qazaqstan halqyna sabyr tileimin!
Bárimiz tutas el bolyp, Jańa Qazaqstandy quraiyq! Jańa Qazaqstan – barshamyzdyń ortaq úiimiz, onyń irgesin birge qalaiyq! Bul óskeleń urpaq úshin kerek.
Elimiz aman, jurtymyz tynysh bolsyn!
