Memleket basshysy «Qazaqstannyń 100 jańa esimi» jobasynyń jeńimpazdarymen kezdesýge qatysty, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev «Qazaqstannyń 100 jańa esimi» jobasynyń jeńimpazdaryn quttyqtap, olardyń óz darynymen kópshilikti moiyndata bilgenin, memleketimizdi órkendetýge aiyryqsha úles qosyp kele jatqanyn aitty. Olar bizdiń halqymyzdyń maqtanyshtary, ózge elder Qazaqstandy osy azamattar arqyly tanyp, baǵalaidy.
– Qazaqtyń qandai halyq ekenin jer júzine tanytyp júrgen birneshe azamat osy jobanyń jeńimpazy atandy. Biz túrli salada jetistikke jetken osyndai otandastarymyzdyń eńbegin dáripteýimiz kerek. Óitkeni tabysty jandardyń tájiribesi árdaiym basqalarǵa úlgi-ónege. Óskeleń urpaq ózderińizge qarap boi túzeidi, uqsaýǵa tyrysady. Men elimizdiń árbir perzenti sizder siiaqty ónegeli bolsyn dep tileimin, – dedi Prezident.
Memleket basshysy tereń bilimin ozyq tájiribemen ushtastyra bilgen azamattardyń elimizdi alǵa jeteleitinine senimdi. Prezident Táýelsizdik kezeńinde ósip jetilgen býynnyń qarym-qabiletin joǵary baǵalady.
– Bilimdi ári sanaly urpaq tárbieleý – bul asa mańyzdy memlekettik mindet. Elimizdiń bolashaǵy daryndy, otanshyl jastardyń qolynda bolýy kerek. Solai bolaryna kámil senemin. Osy strategiialyq maqsatqa qol jetkizý úshin júieli reformalardy mindetti túrde jalǵastyramyz, – dedi Memleket basshysy.
Prezident qoǵamdaǵy birlik pen kelisimniń, barsha qazaqstandyqtardyń jasampaz eńbeginiń arqasynda damýda aitarlyqtai alǵa ilgerilegenimizdi atap ótti.
– Bul jerde bizdiń jetistikterimizdi kórsetetin kóptegen sandar men derekterdi mysalǵa keltirýge bolady. Biraq barlyq tabys adamdardyń berekeli ómirimen, jetken jetistigimen jáne kemel keleshekke umtylysymen ólshenetinin este ustaýymyz kerek. Sizder elimizdiń bailyǵy ekenderińiz sózsiz. Ósip-órkendegen, ádiletti, damyǵan Qazaqstandy qurý sizderge júkteledi. Sondyqtan adam kapitalyn jan-jaqty damytý bizdiń memleketimizdiń basty basymdyǵy bolǵan jáne solai bola bermek, – dedi Qasym-Jomart Toqaev.
Osy ýaqytqa deiin «Qazaqstannyń 100 jańa esimi» jobasyna 7,5 myń adam qatysyp, elimiz talai talantty, talapty qazaqstandyqtardyń atyn tanydy.
– Osy jobanyń arqasynda óziniń erekshe emdeý tásilimen kóptegen adamǵa perzent súiý baqytyn syilaǵan dáriger-reprodýktolog Aidos Ibragimovty búkil elimiz tanydy. Jobanyń 2019 jylǵy qatysýshysy Imanbek Zeikenov jaqynda ǵana «Grammy» syilyǵyn jeńip alyp, onyń aty búkil álemge jaiyldy. Onyń jetistigi tek Qazaqstan úshin ǵana emes, TMD úshin de teńdesiz. Jobanyń tórtinshi maýsym jeńimpazdarynyń jetistikteri de eshkimdi bei-jai qaldyrmaidy, – dedi Memleket basshysy.
Jobanyń árbir qatysýshysyna qarata aitqan sózinde Qasym-Jomart Toqaev olardyń jetistigi Qazaqstan tabysynyń kórinisi ekenin, olar ózderiniń patriottyq áreketi arqyly barsha qazaqstandyqtardy yntalandyratynyn atap ótti.
– Sizderdiń jetistikterińiz kez-kelgen statistikadan artyq. Osynaý keremet joba sizderdi odan ári damýǵa erekshe talpyndyryp, qoǵam men el igiligi úshin jańa ideialardy iske asyrýdyń keń kókjiekterin ashty dep senemin. Elimiz óziniń daryndy jastarynyń kóptigimen maqtana alady jáne maqtanýǵa tiis. Qazaqstannyń bolashaǵy sizderdei progressivti, talantty, patriot jastardyń qolynda. Sizder memlekettiń basqarý tizginin qolǵa alýǵa daiyn bolýlaryńyz kerek. Al biz, iaǵni aǵa tolqyn, osy aitqan sózimizdiń shyndyqqa ainalýy úshin barlyǵyn jasaimyz, – dedi Prezident.
Memleket shyǵarmashylyqqa, bilim men ǵylymǵa, jastardy qoldaýǵa basa nazar aýdaryp otyr. Osy jolda tiimdi áleýmettik lift qalyptastyrýdyń orny bólek. «Bolashaq» halyqaralyq stipendiiasy, Prezidenttik jastar kadrlyq rezervi óskeleń urpaqtyń el damýyna óz úlesin qosýyna mol múmkindik berip otyr.
– Bizdiń ultymyzdyń boiynda kreativti indýstriiany damytýdyń asa zor múmkindigi bar. Dál qazir kreativti ekonomika milliardtaǵan dollar investitsiia tartýdyń, turaqty ekonomikalyq ósýdiń, áleýmettik órkendeýdiń birden-bir joly. Qazaqstan mádenietiniń ókilderi óńirlik jáne jahandyq deńgeide óz oryndaryn oiyp turyp alyp jatyr. Biz osy múmkindikti elimizdiń mádenietin álemge tanytýdyń joly retinde qarastyrýymyz kerek. Sondyqtan men Úkimetke osy strategiialyq mańyzdy salany qoldaý úshin keshendi sharalar qabyldaýdy tapsyrdym, – dedi Qasym-Jomart Toqaev.
Memleket basshysynyń pikirinshe, kreativti indýstriiany damytýdyń tiimdi bir tásili retinde zamanaýi qazaqstandyq aidentikany qalyptastyrý qajet.
Prezident joba qatysýshylarynyń ideiasy men usynystaryn iske asyrý úshin olardy ortalyq memlekettik organ basshylarymen júieli túrde kezdestirip turý qajet dep sanaidy.
– «Júz jańa esim» jobasy qazaqstandyq armannyń anyq iske asqanyn kórsetedi. Árbir talantty, eńbekqor, maqsatshyl adam osy zamannyń batyry jáne ult maqtanyshy bola alady. Sizder siiaqty tabysty azamattar neǵurlym kóp bolsa, elimizdiń básekege qabileti soǵurlym arta túsedi. Halqymyzdyń mereii de ústem bolady. «Júz jańa esim» jobasynyń maqsaty da – osy. Qazirgi zaman – bilim men ǵylymnyń dáýiri. Sanasy sergek, oiy ushqyr jastardy el úshin aianbai eńbek etýge shaqyramyn. Bul sizderdiń qoldaryńyzdan keledi. Men Qazaq eliniń jastaryna senemin! – dedi Memleket basshysy.
Onlain formatta ótken «Qazaqstannyń 100 jańa esimi» jobasy jeńimpazdarynyń kezdesýinde erikti-stýdent Daryn Ábiljanov, ǵalym, adamdar men janýarlarǵa vaktsina ázirleýshi Qaisar Tabynov, IT-maman, robot tehnikasy mektebiniń negizin qalaýshy Damir Núrkejanov, himiia pániniń jas oqytýshysy Ulan Úsenov, syzý pániniń muǵalimi, óz aýylynda kópir salý bastamasyn kótergen Ahat Raqyshev, injener-ónertapqysh Sanjar Taijan, AQSh-tyń hokkei klýbyna bas bapker bolǵan tuńǵysh qazaqstandyq qyz Bulbul Qartanbai, ekolog Ekaterina Vibe, sondai-aq, aqyn, álem ádebietin qazaq tiline aýdaryp júrgen Serikjan Qajytai sóz sóiledi.
