Foto: Aqorda
Memleket basshysy Qasym-Jomart Toqaev qazaqstandyqtardy Otbasy kúnimen quttyqtady, - dep habarlaidy Aqorda .
"Qurmetti otandastar!
Barshańyzdy Otbasy kúnimen shyn júrekten quttyqtaimyn!
Bul – ultymyzdy meiirim men qamqorlyq, ózara qoldaý men azamattyq jaýapkershilik siiaqty myzǵymas qundylyqtar aiasynda uiystyratyn tamasha mereke.
Otbasy – halqymyz úshin qasietti uǵym. Ár adam, eń aldymen, óziniń qasterli shańyraǵynda tulǵa retinde qalyptasady, úlgi-ónege alyp, naǵyz azamatqa tán igi qasietterdi boiyna sińiredi. Otbasynda kórgen tálim-tárbieniń arqasynda elimizde otanshyl, eńbekqor, bilimdi jáne mádenietti urpaq ósip shyǵady.
Sondyqtan biz bárimiz bir el bolyp halqymyzdyń salt-dástúri men qazirgi zamandaǵy ozyq kózqarasy úilesim tapqan otbasy qundylyqtaryn saqtap, ony nyǵaityp, jan-jaqty nasihattaýymyz kerek.
Jaryq ómir syilaǵan ata-analarymyzǵa zor qurmetpen qaraý – qasterli paryz. Ásirese, aialy alaqanymen, aqyl-parasatymen árbir úidi shýaqqa bóleitin analardyń orny erekshe. «Ana – Jer-Ana» – adamzat órkenietiniń ózegi.
Biz asqar taý ákelerimizdiń tabandy eńbegi men eren erligine bas iip, qadir tutýymyz kerek.
Ár shańyraqta yrys-yntymaq bolsa, elimiz de qarqyndy damidy. Bul – Ádiletti jáne Qýatty Qazaqstan qurýdyń asa mańyzdy sharty. Sondyqtan memleket otbasy qundylyqtaryn keńinen dáriptep, ana men bala quqyǵyn qorǵaýǵa airyqsha mán beredi.
Ár shańyraq baq-berekege tolsyn!
Barsha otandastarymyzǵa zor densaýlyq, mol tabys tileimin!"
Aita keteiik, 2025 jyldyń alǵashqy segiz aiynda Qazaqstanda 77 951 jup neke qidyrsa, 226 803 náreste dúniege keldi.
