Foto: Aqorda
Memleket basshysy Qasym-Jomart Toqaev Qazaqstan halqyn Konstitýtsiia kúnimen quttyqtady, dep habarlaidy Ult.kz.
Qurmetti otandastar!
Barshańyzdy Konstitýtsiia kúnimen quttyqtaimyn!
Osydan 30 jyl buryn ótken referendýmda halqymyz Ata zańyn qabyldap, tarihi tańdaýyn jasady.
Konstitýtsiiamyz Qazaqstan Respýblikasy táýelsizdiginiń, qazaq memlekettiliginiń berik tuǵyryna ainaldy. Onda ultymyzdyń búginin jáne bolashaǵyn aiqyndaityn myzǵymas qundylyqtar men qaǵidattar naqty kórinis tapty.
Ata zań Qazaqstannyń barlyq azamatynyń múddesin ultyna, dinine qaramastan birdei qorǵaityn áleýmettik memleket retindegi quqyqtyq irgetasyn qalyptastyrdy. Konstitýtsiia qoǵamdyq kelisim men ishki turaqtylyqtyń basty kepili sanalady. San túrli saladaǵy jetistikterge osy negizgi zańymyzǵa súiene otyryp qol jetkizdik.
Úsh jyl buryn el damýynyń jańa tarihi kezeńindegi mindetterge sáikes, aýqymdy konstitýtsiialyq reforma jasaldy. Onyń basty nátijesi – saiasi júieniń «Kúshti Prezident – yqpaldy Parlament – esep beretin Úkimet» tujyrymdamasynyń negizinde jańǵyrýy.
Konstitýtsiialyq reformada adam quqyqtaryn qorǵaýǵa, Zań men tártip ústemdigin ornyqtyrýǵa basa mán berildi. Ata zańǵa álemdik tájiribede buryn-sońdy bolmaǵan, innovatsiialyq sipattaǵy birqatar jańa ereje engizildi. Qazaqstannyń konstitýtsiialyq reformasyna Venetsiia komissiiasy jáne ózge de bedeldi halyqaralyq uiymdar, sondai-aq sheteldik sarapshylar oń baǵasyn berdi.
Ádiletti, Taza, Qýatty ári Qaýipsiz Qazaqstan quramyz desek, azamattarymyz Ata zańdy qurmettep, onyń barlyq erejesin múltiksiz saqtaýy kerek.
Qazaqstan Respýblikasynyń strategiialyq maqsattaryna ultymyzdy jumyldyratyn Konstitýtsiiamyzdyń aiasynda barsha azamatymyzdyń Otanymyzdy órkendetý úshin jasampazdyqpen eńbek etýine barlyq jaǵdai jasalǵan.
Elimizdiń barsha azamatyna zor densaýlyq, baq-bereke tileimin!
