Prezident Qasym-Jomart Toqaev Qazaqstan halqyn Naýryz meiramymen quttyqtady, dep habarlaidy "Ult aqparat" Aqordaǵa silteme jasap.
«Qurmetti otandastar! Barshańyzdy Ulystyń uly kúni – Naýryz merekesimen shyn júrekten quttyqtaimyn!
Áz-Naýryz – jańashyldyq pen jasampaz rýhtyń jarshysy. Osy kúnderi Jer-ana qaita túlep, tirshilik ataýly túgel jandanady.
Taǵylymy mol bul mereke – jańarý men jańǵyrýdyń, adam men tabiǵat arasyndaǵy úndestiktiń, kelisim men tatýlyqtyń altyn arqaýy.
Halqymyz qashanda jyl basyn izgi nietpen, úkili úmitpen, aq jarma tilekpen qarsy alady.
Ulystyń uly kúninde urpaqtar sabaqtastyǵy, dostyq qarym-qatynastar men qonaqjailyq salty dáripteledi. Sondai-aq, tereńnen tamyr tartatyn qundylyqtarymyz, úlkenge qurmet, kishige izet kórsetý dástúri erekshe saltanat qurady», - dedi Memleket basshysy.
Prezident atap ótkendei, Naýryz – ultyna, dinine qaramastan, barsha jurtty uiystyratyn jalpyulttyq meiram.
«Bul mereke halqymyzdy bereke-birlik pen ortaq múddege jumyldyrady. Biz árdaiym qiyn sátte bir-birimizge qol ushyn sozyp, qoldaý kórsetýge daiynbyz.
Ókinishke qarai, biyl Naýryz meiramy ádetten tys jaǵdaiǵa tuspa-tus kelip otyr. Pandemiiaǵa ainalǵan koronavirýstyń keńinen taralýy jahandyq ekonomikamen qatar bizdiń elimizge de aitarlyqtai zardabyn tigizýde. Búkil álem kúrdeli synaqty bastan ótkerýde.
Osyǵan orai, meniń Jarlyǵymmen 2020 jylǵy 16 naýryzdan bastap Qazaqstan aýmaǵynda tótenshe jaǵdai engizildi. Memlekettik komissiia qurylyp, azamattarymyzdyń densaýlyǵyn qorǵaý jáne elimizdegi ekonomikalyq ahýaldy turaqtandyrý úshin naqty sharalar qolǵa alyndy.
Biz yrys-yntymaǵymyzdyń arqasynda bul qiyn-qystaý kezeńnen de súrinbei ótemiz dep senemin.
Sizderge zor densaýlyq, baq-bereke jáne tolaiym tabys tileimin!
Áz-Naýryz ár shańyraqqa shattyq pen qýanysh ákelsin!
Ulys oń, aq mol bolsyn!», - delingen quttyqtaýda.
