QR Prezidenti Qasym-Jomart Toqaev Jambyl oblysynyń Qordai aýdanyndaǵy Qarakemer aýylynyń jurtshylyǵymen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev kezdesýde 1 naýryz Alǵys aitý kúni Jambyl oblysynyń Qordai aýdanyna jumys saparymen arnaiy kelgenin aitty. Prezident bul kúni toilaýdan góri, aýyl turǵyndarymen ózekti máseleler jóninde pikir almasýdy jón kórgen.
– Qordaida bolǵan oqiǵa halqymyzdy dúr silkindirdi, búkil álemdi eleń etkizdi. Shyny kerek, bul janjal memleketimizge, elimizge nuqsan keltirdi. Abyroiymyzǵa ziiany tidi. Endi tutas ult bolyp osyndai teris tájiribeden sabaq alýymyz kerek. Eń aldymen, keleshekte mundai qasiretti boldyrmaý úshin tiisti shara qoldanýymyz qajet, – dep atap ótti Prezident.
Memleket basshysy Qasym-Jomart Toqaev Elbasy Nursultan Nazarbaevtyń saiasatynyń arqasynda Qazaqstannyń álem jurtshylyǵyna bedeldi, abyroily, qarqyndy damyp kele jatqan el retinde tanymalǵanyn qordailyqtarǵa aita kele, endigi mindet osy jetistikterdi saqtap qalý, ony barynsha arttyrý ekenin atap ótti.
Jambyl oblysynyń jańa basshylyǵynyń aldyna aimaqtyń ósip-órkendeýin tejeitin kedergilerdi joiyp, halyqtyń ál-aýqatyn arttyratyn sharalar qabyldaý mindeti qoiyldy.
– Qaqtyǵys bolǵan jerde eshqashan, eshqandai damý bolmaidy. Bul – zańdylyq. Ókinishke qarai, oblys basshylary bul zańdylyqty durys túsingen joq. Sondyqtan oblys basshylary, sonyń ishinde quqyq qorǵaý organdarynyń basshylary tolyǵymen aýystyryldy, qyzmetkerler jumystan bosatyldy. Jańa basshylar taǵaiyndaldy. Solardyń arasynda Berdibek Saparbaev bar. Bul azamatty jaqsy tanisyzdar. Tájiribesi mol memlekettik qyzmetshi. Onyń aldynda turǵan maqsat – turaqsyzdyqqa túrtki bolatyn jaǵdailardy túbegeili joiý jáne óńirdiń damýyna serpin berý, – dedi Qasym-Jomart Toqaev.
Prezidenttiń aitýynsha, Táýelsizdiktiń arqasynda qazaq halqy shyn mánindegi memleket quraýshy ultqa ainaldy. Munyń mańyzy tereń. Eń aldymen, bul – memleketimizdiń bolashaǵy úshin erekshe jaýapkershilik, qasietti borysh. Aýyl aqsaqaldary osy baǵytta jumys júrgizip, eldegi bereke-birlikti nyǵaityp, jastarymyzǵa durys jol kórsetip, tárbie berýi kerek.
– Tól halqymyzdyń shynaiy qasietteri, bolmysy qandai bolýy kerek? Bul, eń aldymen, keńshilik, jomarttyq, jaisańdyq, jasampazdyq degen sóz. Biz basqa ulttarǵa, ózge elderge ónege, úlgi kórsetýimiz kerek. Qazaq halqy beiqam, jalqaý, erinshek, onyń qolynan eshqandai jumys kelmeidi degen jaǵymsyz áńgimelerdi doǵarý qajet. Biraq osyndai teris pikirlerdi toqtatý úshin ózimizdiń eńbekqorlyǵymyzdy kórsetýimiz kerek, – dep Memleket basshysy aqsaqaldardy urpaq tárbiesinde belsendilik tanytýǵa shaqyrdy.
Prezident tergeý jumystary zańǵa sáikes júrgiziletinin, zań aldynda bári teń ekenin aityp, Qordaidaǵy jergilikti qyzmetkerlerdiń para alý jáne shekara arqyly zańsyz saýda jasaý máselelerin sheshýdi tapsyrdy.
– Aýdanda bir top adam belsendi túrde kontrabandamen ainalysyp júrgen. Bul – belgili nárse. Osy iske basqa top ta qatysqysy kelgen. Bir sózben aitsaq, zańsyz tabys kózi úshin eki qylmystyq toptyń arasynda teketires paida bolǵan. Bul teketires saldarynan kóp adam zardap shekti. 11 adam qaza tapty. Ony ashyq aitý kerek. Endi quqyq qorǵaý organdarynyń aldynda turǵan maqsat – barlyq qylmyskerlerdi ultyna qaramai, zańǵa sáikes jazaǵa tartý. Onsyz elimizde tártip bolmaidy, – dedi Prezident.
Sondai-aq kezdesýde Qordai aýdandyq ardagerler keńesiniń tóraǵasy Ábdibek Seiilhanov, Jambyl oblysynyń «Qurmetti azamaty» Tóle Súgirbai sóz sóilep, aýdandaǵy áleýmettik jáne basqa da máselelerdi sheshý jóninde óz oilaryn ortaǵa saldy.
– Ultaralyq tatýlyq – bizdiń eń basty qundylyǵymyz. Sondyqtan oǵan syzat túsirmeýimiz kerek, – dep Qasym-Jomart Toqaev jiyndy qorytyndylady.
Budan keiin Memleket basshysy Qarakemer aýylynyń sport keshenine baryp, jas sportshylardyń jattyǵý barysyn kórdi. Bolashaq sportshylarǵa tabys tilep, olarǵa qajetti doptar men boks qolǵaptaryn syiǵa tartty.
