Qasym-Jomart Toqaev Almaty qalasyndaǵy jańadan ashylǵan Qaraǵaily saiabaǵyn aralap kórdi, dep habarlaidy "Ult aqparat" Aqordaǵa silteme jasap.
Prezidentke Almaty qalasyn kórkeitýge baǵyttalǵan aldaǵy jumys jospary men kógaldandyrý isiniń aýqymy týraly esep berildi. Memleket basshysyna «Jasyl Almaty» baǵdarlamasy aiasynda qala boiynsha 3 jylda 1 million túp kóshet otyrǵyzý josparlanǵany jóninde baiandaldy. Biyl 350 myń kóshet egý josparlanyp otyr. Aldaǵy ýaqytta saiabaqtyń aýmaǵyn 63 gektarǵa deiin keńeitý kózdelip otyr.
Qasym-Jomart Toqaevqa Ile Alataýy tabiǵi parki men Almaty qoryǵy aýmaǵynda saiahatshylar men alpinisterdiń qaýipsizdigi men jaily demalysy úshin salynǵan shaǵyn úiler kórsetildi. Olar jylytý peshterimen jáne tótenshe jaǵdaida qajetti qutqarý quraldarymen jabdyqtalǵan.
Sońynda Memleket basshysy qala turǵyndary men qonaqtardyń jaily demalýyna, qaýipsizdigine jáne qorshaǵan ortanyń tazalaǵyna basa mán berilgen jumystardyń jalǵasa beretinine senim bildirdi.
– Men Qazaqstan boiynsha 2 milliard túp kóshet otyrǵyzý bastamasyn usyndym. Óitkeni biz, shyn máninde, kógaldandyrýǵa zárýmiz. Almaty buryn jasyl qala edi. Ókinishke qarai, qazirgi kezde bul mártebesin joǵaltyp aldy. Aiyrylyp qalǵan mártebemizdi qaitarýymyz kerek. Aǵash egý – biik mádeniettiliktiń belgisi, – dedi Qasym-Jomart Toqaev.
