QR Prezidenti Qaýipsizdik keńesiniń otyrysynda gaz ken oryndaryna geologiialyq barlaýdy jandandyrýdy tapsyrdy. Bul týraly búgin QR Energetika ministrliginiń keńeitilgen alqa májilisinde vedomstvo basshysy Qanat Bozymbaev aitty, dep habarlaidy QazAqparat tilshisi.
«Salanyń barlyq mindetterin júzege asyrý úshin resýrstyq bazalardy, tiisti máselelerdi odan ary pysyqtaý qajet. Osyǵan bailanysty 7 aqpan kúni ótken Qaýipsizdik keńesiniń otyrysynda Elbasy geologiialq barlaýdy, onyń ishinde gaz resýrstaryn barlaýdy jandandyrýdy tapsyrdy. Sondyqtan ministrlik QazMunaiGazben birge ázirlenip jatqan 2021-2025 jyldarǵa arnalǵan geologiialyq barlaý baǵdarlamasy aiasynda gaz ken oryndaryn geologiialyq barlaý jumystaryn jandandyrýy qajet. Birinshi vitse-ministr Mahambet Dosmuhambetovke muny baqylaýǵa alýdy tapsyramyn», - dedi Q.Bozymbaev.
Jalpy, onyń dereginshe, 2018 jyly elimizde 55,5 mlrd tekshe metr gaz óndirilgen. 2017 jylmen salystyrǵanda ósim 5 paiyzdy quraidy. Al aǵymdaǵy jyly elimiz 55 mlrd tekshe metr gaz óndirýdi josparlap otyr.
Taýarlyq gaz óndirý kólemi de 54 paiyzǵa artyp, 33,3 mlrd tekshe metrge jetip otyr. Al suiytylǵan gazdyń ótken jylǵy óndirilgen kólemi 3,1 mln tonnany qurady.
«Eldiń gazdandyrylý deńgeii 2019 jyldyń 1 qańtarynda 49,68 paiyzǵa jetti. 2017 jylmen salystyrǵanda 23 paiyz ósim bar. 9 million adam kógildir otynǵa qol jetkizgen. Al aǵymdaǵy jyldyń qorytyndysynda gazdandyrý deńgeii 50,5 paiyzǵa jetetindigi josparlanǵan», - dedi Q.Bozymbaev.
