قر پرەزيدەنتٸ قاۋٸپسٸزدٸك كەڭەسٸنٸڭ وتىرىسىندا گاز كەن ورىندارىنا گەولوگييالىق بارلاۋدى جانداندىرۋدى تاپسىردى. بۇل تۋرالى بٷگٸن قر ەنەرگەتيكا مينيسترلٸگٸنٸڭ كەڭەيتٸلگەن القا مەجٸلٸسٸندە ۆەدومستۆو باسشىسى قانات بوزىمباەۆ ايتتى, دەپ حابارلايدى قازاقپارات تٸلشٸسٸ.
«سالانىڭ بارلىق مٸندەتتەرٸن جٷزەگە اسىرۋ ٷشٸن رەسۋرستىق بازالاردى, تيٸستٸ مەسەلەلەردٸ ودان ارى پىسىقتاۋ قاجەت. وسىعان بايلانىستى 7 اقپان كٷنٸ ٶتكەن قاۋٸپسٸزدٸك كەڭەسٸنٸڭ وتىرىسىندا ەلباسى گەولوگييالق بارلاۋدى, ونىڭ ٸشٸندە گاز رەسۋرستارىن بارلاۋدى جانداندىرۋدى تاپسىردى. سوندىقتان مينيسترلٸك قازمۇنايگازبەن بٸرگە ەزٸرلەنٸپ جاتقان 2021-2025 جىلدارعا ارنالعان گەولوگييالىق بارلاۋ باعدارلاماسى اياسىندا گاز كەن ورىندارىن گەولوگييالىق بارلاۋ جۇمىستارىن جانداندىرۋى قاجەت. بٸرٸنشٸ ۆيتسە-مينيستر ماحامبەت دوسمۇحامبەتوۆكە مۇنى باقىلاۋعا الۋدى تاپسىرامىن», - دەدٸ ق.بوزىمباەۆ.
جالپى, ونىڭ دەرەگٸنشە, 2018 جىلى ەلٸمٸزدە 55,5 ملرد تەكشە مەتر گاز ٶندٸرٸلگەن. 2017 جىلمەن سالىستىرعاندا ٶسٸم 5 پايىزدى قۇرايدى. ال اعىمداعى جىلى ەلٸمٸز 55 ملرد تەكشە مەتر گاز ٶندٸرۋدٸ جوسپارلاپ وتىر.
تاۋارلىق گاز ٶندٸرۋ كٶلەمٸ دە 54 پايىزعا ارتىپ, 33,3 ملرد تەكشە مەترگە جەتٸپ وتىر. ال سۇيىتىلعان گازدىڭ ٶتكەن جىلعى ٶندٸرٸلگەن كٶلەمٸ 3,1 ملن توننانى قۇرادى.
«ەلدٸڭ گازداندىرىلۋ دەڭگەيٸ 2019 جىلدىڭ 1 قاڭتارىندا 49,68 پايىزعا جەتتٸ. 2017 جىلمەن سالىستىرعاندا 23 پايىز ٶسٸم بار. 9 ميلليون ادام كٶگٸلدٸر وتىنعا قول جەتكٸزگەن. ال اعىمداعى جىلدىڭ قورىتىندىسىندا گازداندىرۋ دەڭگەيٸ 50,5 پايىزعا جەتەتٸندٸگٸ جوسپارلانعان», - دەدٸ ق.بوزىمباەۆ.
