Qasym-Jomart Toqaev Exxon Mobil korporatsiiasynyń aǵa vitse-prezidenti Nil Chapmandy qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan men Exxon Mobil korporatsiiasy arasyndaǵy yqpaldastyqtyń perspektivalary, kómirsýtegi salasyndaǵy birqatar jobalardyń júzege asyrylýy, «jasyl» tehnologiialardy engizý, sondai-aq, álemdik energetika naryǵyndaǵy qazirgi ahýal talqylandy.
Memleket basshysyna Qashaǵandy igerý qarqyny men Teńiz ken ornyn keńeitý baǵytyndaǵy jumystar baiandaldy.
Prezident korporatsiianyń elimizben seriktestik ornatqan 28 jyl ishinde Qazaqstan ekonomikasyn damytýǵa qosqan úlesin joǵary baǵalady.
Nil Chapman Exxon Mobil úshin Qazaqstanmen aradaǵy yntymaqtastyqtyń mańyzdy ekenin atap ótip, ózara yqpaldastyqty odan ári nyǵaitýǵa nietti ekenin jetkizdi. Sonymen qatar amerikalyq kásipker munaidyń álemdik naryǵyn odan ári damytý jónindegi oi-pikirin ortaǵa salyp, atalǵan saladaǵy ózekti máseleler týraly aitty.
