Memleket basshysy eshbir partiiaǵa basymdyq bermegeni jón. Bul týraly AMANAT partiiasynyń sezinde Prezident Qasym-Jomart Toqaev málim etti, dep habarlaidy QazAqparat.
«Biz birlesip kóp jumys atqardyq. Degenmen, ýaqyt bir orynda turmaidy. Qazir talai nárse ózgerip jatyr. Aldymyzda aýqymdy mindetter bar. Búginde elimizdegi barlyq salany túbegeili monopoliiasyzdandyrý asa mańyzdy. Osy úderisten saiasi júie de syrt qalmaýy kerek. Memleket basshysy eshbir partiiaǵa basymdyq bermegeni jón, iaǵni saiasi turǵydan beitarap bolýy qajet. Bul – meniń aiqyn ustanymym», - dedi Memleket basshysy.
Osy oraida Prezident mundai qaǵida sailaýǵa qatysatyn barlyq kúshterge teń múmkindik týǵyzatynyn atap ótti.
«Saiasi júiede ádildiktiń ornaýyna jol ashady. Partiia atqarýshy bilikke táýeldi bolmasa, oǵan halyqtyń senimi nyǵaiyp, bedeli artady. Qazir uiym Májiliste jáne máslihattarda edáýir basymdyqtarǵa ie bolyp otyr. Sondyqtan Úkimet pen ákimdikterdiń jumysyna qatań baqylaý jasai alady», - dedi Qasym-Jomart Toqaev.
