Nur-Sultan qalasynyń ákimdiginde Memleket basshysy Qasym-Jomart Toqaevtyń tóraǵalyǵymen elordany odan ary damytý máseleleri jónindegi májilis ótip jatyr, dep habarlaidy QazAqparat tilshisi.
«Bas qala - egemen elimizdiń negizgi ári asa mańyzdy jobasy. Búkil álemge Nazarbaev modeli nemese Qazaqstan joly dep moiyndalǵan strategiia dál osy shahardan bastaldy. Elbasy Nursultan Nazarbaevtyń bastamasymen salynǵan astana jyldan jylǵa damyp kele jatyr. Búginde eýraziianyń júreginde ornalasqan elordamyz iri saiasi-ekonomikalyq, mádeni jáne bilim ortalyǵy bolyp qalyptasty», - dedi Qazaqstan Prezidenti.
Memleket basshysy Nur-Sultan qalasyn ary qarai damytyp, jańa belesterge shyǵarý aldaǵy negizgi mindetterdiń biri ekendigin basa aitty.
«Osy máselelerdi búgin talqylaityn bolamyz. Aldymen bas qalamyzdyń birqatar jetistigine toqtalaiyn. Birinshiden, elordamyzdyń ekonomikasy sońǵy jyldarda oidaǵydai damyǵanyn atap ótý qajet. 21 jyl ishinde ishki óńirlik ónim shamamen 5,5 esege ósti. Buǵan qurylysty kúsheitý, biznesti damytý jáne investiia tartýdyń arqasynda qol jetkizildi. Qala ekonomikasyna 9 trln teńgeden astam investitsiia quiylyp, 2018 jyly biýdjetke 1,1 trln teńge tústi. Shaǵyn jáne orta biznes halyqtyń ál-aýqatyn arttyrýǵa múmkindik berdi», - dedi Q.Toqaev.
Ekinshiden, QR Prezidenti qala infraqurylymy qarqyndy damyp kele jatqanyna toqtaldy.
«Astanamyz ómir súrýge qolaily bolýy úshin jan-jaqty abattandaryldy. Turǵyn úi jáne jol qurylysy, áleýmettik sala infraqurylymy aitarlyqtai damydy. Nur-Sultan qalasy mádeni ári ziiatkerlik ortalyqqa ainaldy. Biz osy damý qarqynyn báseńdetpeýimiz jáne de ary qarai kúsheitýimiz kerek», - dedi Memleket basshysy.
Q.Toqaev, úshinshiden, elordamyzda mańyzdy halyqaralyq sharalar men kezdesýler ótkizilip turatyndyǵyn aitty.
«Bul úlken jetistik. EQYU sammiti, Álemdik jáne dástúrli dinder liderleriniń sezderi, halyqaralyq EKSPO kórmesi, jyl saiynǵy Astana ekonomikalyq forýmy jáne jýyrda ótken jahandyq innovatsiialyq sammit sonyń aiqyn dáleli. Nur-Sultan qalasyn halyqaralyq ortalyq retinde ary qarai damyta beretin bolamyz. Kóp jumys atqaryldy, biraq, munymen shektelip qalmaýymyz kerek. Biz úshin mańyzdy maqsat - elordamyzdyń damýyn barlyq baǵyttar boiynsha jańa sapaly deńgeige kóterý», - dedi QR Prezidenti.
