Foto: Akorda.kz
Memleket basshysynyń jarlyǵymen UOS ardagerleri Ábdiǵali Qaimoldin men Ivan Gapichke "Halyq qaharmany" ataǵy berildi, - dep habarlaidy "Ult aqparat" Aqordanyń baspasóz qyzmetine silteme jasap.
"Memleket basshysynyń Jarlyǵymen 1941–1945 jyldardaǵy Uly Otan soǵysynda kórsetken erligi, batyldyǵy, janqiiarlyǵy men soǵystan keiin memlekettik jáne qoǵamdyq qyzmetke belsendi qatysqany úshin Ábdiǵali Qaimoldinge «Halyq qaharmany» ataǵy berilip, airyqsha erekshelik belgisi – Altyn juldyz ben «Otan» ordeni tapsyryldy", - delingen habarlamada.
QAIMOLDIN ÁBDIǴALI - Uly Otan soǵysy jáne eńbek ardageri. 1921 jyly 30 maýsymda Semei oblysy Abyraly aýdany Uzynbulaq aýylynda dúniege kelgen.
1941 jyly ásker qataryna shaqyryldy. 1941-1945 jyldyń 9 mamyry aralyǵynda Stalingrad, 1-Ýkraina, 1-Belarýs, 3-Baltyq maidandarynda shaiqasty. 1946 jyldyń maýsym aiynda ásker qatarynan bosatylǵan.
Atalǵan qyzmetten keiin partiiada jáne memlekettik organdarda jumys istedi. Áýeli KOKP Semei oblystyq komitetinde, sodan keiin Jańasemei, Novopokrovsk aýdandarynyń atqarý komitetinde eńbek etti. 1977-1982 jyldary «Túrksib» sovhozy partiia komitetiniń hatshysy bolyp jumys istedi jáne osy jerden qurmetti demalysqa shyqty.
Qyzyl juldyz jáne I dárejeli Otan soǵysy ordenderimen, «Jaýyngerlik eńbegi úshin», «Kenigsbergti alǵany úshin», «Germaniiany jeńgeni úshin» medaldarymen marapattalǵan.
Sondai-aq, Memleket basshysynyń Jarlyǵymen 1941–1945 jyldardaǵy Uly Otan soǵysynda kórsetken erligi men janqiiarlyǵy úshin Jeńis Paradynyń qatysýshysy Ivan Stepanovich Gapichke «Halyq qaharmany» ataǵy berilip, airyqsha erekshelik belgisi – Altyn juldyz ben «Otan» ordeni tapsyryldy.
GAPICh IVAN STEPANOVICh - Uly Otan soǵysy jáne eńbek ardageri. 1923 jyly 2 aqpanda Aqmola qalasynda dúniege kelgen.
Polshany, Chehoslovakiiany, Ýkrainany azat etýge qatysty. Búkil soǵysty bastan ótkergen maidanger fashisterdiń garnizondary men komendatýralaryn talqandaǵan, oq-dári jáne azyq-túlik qoimalaryn joiǵan otriadtyń jaýyngerlik operatsiialaryna qatysqan.
Qyzyl juldyz jáne III dárejeli Dańq ordenderimen, «Erligi úshin», «Jaýyngerlik eńbegi úshin», «Kenigsbergti alǵany úshin», «Germaniiany jeńgeni úshin» medaldarymen, «Prokýratýranyń qurmetti qyzmetkeri» tósbelgisimen, I, II, III dárejeli «Eren eńbegi úshin» medaldarymen,«Qurmet» ordenimen, II dárejeli «Dańq» ordenimen marapattalǵan. Batys Qazaqstan oblysynyń qurmetti azamaty.
1945 jyly 24 maýsymda Qyzyl alańda ótken Jeńis paradynyń qatysýshysy.
