Aýyl sharýashylyǵy ónimderimen ózin tolyqtai qamtamasyz etken el - naǵyz táýelsiz memleket. Bul týraly elordany odan ary damytý máseleleri jónindegi májiliste Elbasy Nursultan Nazarbaev aitty, dep habarlaidy QazAqparat.
«Barlyq ýaqytta da qalanyń azyq-túlik beldeýi jaiynda aityp kelemin. Qalada infliatsiia 7,5 paiyz. Qazir Qazaqstandaǵy eń joǵarysy deidi. Solai ma, álde qansha?», - dedi Nursultan Nazarbaev qala basshysy Áset Isekeshevke qarata.
Astana ákiminiń sózine qaraǵanda, naýryz aiynyń qorytyndysynda elorda infliatsiia deńgeii boiynsha 5-6 orynda tur.
«Al azyq-túlik beldeýine qatysty aitar bolsam, Nursultan Ábishuly sońǵy 5 jylda beldeý damydy. Aqmola, Qaraǵandy, Pavlodar oblystarynda Astana bazarlaryna ónimderin ákeletin kásiporyndar bar. Jáne de elordalyq kásiporyndar qalany 31 paiyzǵa qamtyp otyr. 44 paiyzy kórshiles oblystardyń kásiporyndary esebinen qamtamasyz etiledi. Olar Astananyń bazarlaryna baǵdarlanǵan», - dedi Áset Isekeshev.
Kelesi kezekte QR Premer-Ministriniń orynbasary - Aýyl sharýashylyǵy ministri Ómirzaq Shókeevti ornynan turǵyzǵan Elbasy osy máselege qatysty esep berýin surady.
«Biz 20 ónim túri boiynsha tereń saraptama jasadyq. 12 túri boiynsha tolyqtai 100 paiyz qamtamasyz etip otyrmyz. Olar: ettiń barlyq túri, qus eti, kartop, qyzylsha, qiiar, qyzynaq. 8 túri boiynsha bizde 70 paiyz qamtamasyz etilse, 30 paiyzy boiynsha naqty sharalardy belgiledik. Bizde Astana tóńireginde sýarmaly jerlerdi ulǵaitý kerek. Qazir elordanyń tóńireginde 2 myń gektar jer daiyn, qubyrlary jatyr, endi jaraqtandyrý qajet. Sonymen qatar Nura, Esil arnasy mańynan da 2 myń gektar jer tabamyz», - dedi Ómirzaq Shókeev.
Osy rette Qazaqstan Prezidenti ózin aýyl sharýashylyǵy ónimderimen tolyqtai qamtamasyz etken el naǵyz táýelsiz memleket sanalatyndyǵyn basa aitty.
«Biz aýyl sharýashylyǵy elimiz ǵoi. Biz áli kúnge deiin ónimderdiń basym bóligin syrttan alyp otyrmyz. Et óndiremiz, shujyqty syrttan alamyz. Jemis-jidek, kókónisti de tasymaldaimyz. Bizde ne bar, sonyń barlyǵyn syrttan alyp otyrmyz. Múmkin nandy da syrttan alatyn shyǵarmyz», - dedi Memleket basshysy.
Sonymen qatar Nursultan Nazarbaev QR Premer-Ministriniń orynbasarlary Erbolat Dosaev pen Ómirzaq Shókeevke azyq-túlik máselesine qatysty barlyq túitkilderdi sheshýdi tapsyrdy.
«Bul senderge úi tapsyrmasy. Baqytjan Ábdiruly, (Úkimet basshysy) túsindiń be? Orynbasarlaryńmen jaqsylap jumys iste!», - dedi Elbasy.
