Memleket basshysy BUU-nyń 8-shi Bas hatshysy, Boao Aziia forýmynyń tóraǵasy, Jahandyq jasyl damý institýty (GGGI) Assambleiasynyń Prezidenti Pan Gi Mýnmen kezdesý ótkizdi, dep habarlaidy "Ult aqparat" Aqorda baspasóz-qyzmetine silteme jasap.
Qazaqstan Prezidenti Boao forýmyna qatysýǵa shaqyrǵany úshin Pan Gi Mýnǵa rizashylyǵyn bildirip, onyń BUU Bas hatshysy qyzmetin atqarǵan kezde álemdik qaýymdastyqqa eleýli eńbek sińirgenin atap ótti.
"Meniń pikirimshe, Siz Birikken Ulttar Uiymy tarihyndaǵy eń úzdik bas hatshylardyń biri retinde qyzmet ettińiz. Eki jarym jyl Sizdiń jetekshiligińizben jumys isteý men úshin keremet kezeń ári zor mártebe boldy", – dedi Prezident.
Pan Gi Mýn Qasym-Jomart Toqaevtyń halyqaralyq yntymaqtastyqty damytýǵa eleýli úles qosqanyn aitty.
"Siz Qazaqstan Prezidenti retinde óńirdegi beibitshilik pen kelisimdi saqtaýǵa, adamzat pen BUU-nyń múmkindikterin keńeitýge belsendi atsalysyp kelesiz. Meniń oiymsha, Qazaqstan Shyǵys pen Batys arasyndaǵy asa mańyzdy kópir rólin atqaryp otyr. Siz Shyǵys pen Batystyń ahýalyn jaqsy túsinesiz. Bul rette tájiribeńiz mol", – dedi Koreia diplomaty.
Kezdesýde halyqaralyq kún tártibindegi ózekti máseleler, onyń ishinde BUU-nyń jahandyq syn-qaterlerdi tiimdi eńserýdegi róli talqylandy.
Memleket basshysy Qazaqstannyń halyqaralyq bastamalaryna da toqtaldy. Bas Assambleianyń 79-shy sessiiasy aiasynda Qazaqstan Frantsiiamen birlesip, One Water sammitin ótkizýdi josparlap otyr. Sonymen qatar Astanada 2026 jyly Óńirlik klimattyq sammit uiymdastyrylady.
Qasym-Jomart Toqaev Pan Gi Mýndy aldaǵy Astana halyqaralyq forýmyna bas spikerlerdiń biri retinde qatysýǵa shaqyrdy.
