Memleket basshysy Qasym-Jomart Toqaevtyń búgingi úndeýi kópshiliktiń kóńilinde júrgen máselelerge jaýap berdi. Mundai pikirdi saiasattanýshy Rasýl Jumaly bildirdi, dep habarlaidy QazAqparat.
«Eń bastysy - ishtegi jáne syrttaǵy túrli táýekelderge boi usynbai, demokratiialyq reformalar jalǵasyn tabady. Ulttyq quryltaidyń qurylatyny, jergilikti ózin-ózi basqarýdy kúsheitý men ákimderdi tańdaý, jańa partiialarǵa jol ashý, adam quqyqtarynyń qorǵalýyn jetildirý sekildi naqty qadamdar iske aspaq. Qasym-Jomart Kemeluly sýperprezidenttik júieniń eskirgenin alǵa tarta otyryp óziniń partiiaǵa múshe bolmaitynyn málimdedi jáne quzyretteriniń birtalaiyn Parlamentke berip, onyń áleýetin kúsheitpek», - deidi saiasattanýshy.
Sonymen qatar, ol prezidenttiń týystaryna memlekettik bilikte nemese ulttyq kompaniialarda, kvazimemlekettik sektorda qyzmet isteýge tyiym salatyn jańa zań qabyldanatynyn quptarlyq is deidi.
«Prezident týystarynyń memlekettik qyzmet pen ulttyq kompaniialarda jumys isteýine tyiym salynady. Barsha Alash balasyn erekshe qýantqan jańalyq - kezinde qysqaryp qalǵan Jezqazǵan, Semei óńirlerine oblys mártebesin berip, olardy jańǵyrtý, sondai-aq Almaty oblysyn ákimshilik basqarý júiesin jetildirý úshin ekige bólý. Olarǵa beriletin ataýlardan qazaqy iis ańqyp tur - tiisinshe Ulytaý, Abai, Jetisý. Árine, Prezident búgin jasaǵan usynystar men mindetter áldeqaida keń aýqymda túsinýdi talap etedi. Alaida qazirdiń ózinde ádiletti qoǵam men el igiligin basymdyq retinde alǵan Jańa Qazaqstan tujyrymdamasy iske asyp jatqany kúmán týdyrmas», - dedi Rasýl Jumaly.
Onyń paiymdaýynsha, Prezident osy jolǵy Joldaýynda burynnan halyqtyń kókeiinde júrgen máselelerge nazar aýdaryp, olqylyqtardyń aldyn alýǵa tyrysqan.
«Joldaýda eń aldymen burynnan oida júrgen másellerdiń sheshiletini qýantty», – dedi saiasattanýshy.
