Memleket basshysy Batys Qazaqstan oblysynyń ákimi Ǵali Esqalievti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidentine óńirdiń áleýmettik-ekonomikalyq damýynyń negizgi kórsetkishteri, jer qatynastaryna qatysty buǵan deiin berilgen tapsyrmalardyń oryndalýy, sondai-aq, «Halyq únine qulaq asatyn memleket» tujyrymdamasynyń júzege asyrylýyn qamtamasyz etý, áleýmettik-kásipkerlik korporatsiialarynyń jumystary, investitsiia tartý jáne Jaiyq transshekaralyq ózeniniń problemalary jóninde baiandaldy.
Qasym-Jomart Toqaevqa jergilikti jurtshylyqtyń biýdjetten qarjylandyrylatyn jobalardyń júzege asyrylýyn baqylaýǵa, óńirdi sýmen jáne jylýmen qamtamasyz etýge, avtojoldar salýǵa jáne elektr jelilerin jańǵyrtýǵa qatysty máselelerdi sheshýge atsalysyp jatqany týraly málimet berildi.
Memleket basshysy óńirdiń et ónimderin ulǵaitýǵa jáne osy salada elimizdiń álemdik naryqtaǵy ornyn nyǵaitýǵa múmkindigi bar ekenin atap ótip, ákimdiktiń Batys Qazaqstan oblysynda mal sharýashylyǵyn damytýdyń ǵylymi-óndiristik bazasyn qurý jónindegi josparyn qoldady.
Prezident Oralda mashina jasaý salasynyń tehnikalyq jáne kadrlyq áleýetin saqtaý qajet ekenine nazar aýdaryp, Ǵali Esqalievke demografiialyq qaýipti azaitý, jańa jumys oryndaryn ashý jáne investorlardy qoldaý jóninde mindet júktedi.
Memleket basshysy ár óńirdiń ereksheligin eskere otyryp, biýdjetti ádil bólýdiń, biýdjetaralyq qatynastardyń tiimdi tetigin engizýdiń mańyzdylyǵyn aitty. Onyń aitýynsha, oblystar salyqtan túsetin qarjyny jergilikti deńgeide qalai jumsaý kerek ekenin anyq túsinýge tiis.
