Memleket basshysy Nursultan Nazarbaev Bas prokýror Jaqyp Asanovty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda J.Asanov Nursultan Nazarbaevqa quqyq qorǵaý organdarynyń 2016 jylǵy qyzmetiniń qorytyndylary jáne aldaǵy kezeńge arnalǵan jumys jospary týraly baiandady.
Qazaqstan Prezidenti eldegi qoǵamdyq qaýipsizdik ahýalyn jaqsartýǵa baǵyttalǵan reformalardyń mańyzdylyǵyn atap ótti.
– Osy jyldar ishinde biz barlyq salada reforma jasap kelemiz. El táýelsizdiginiń 25 jyldyǵynyń qorytyndysy boiynsha ekonomikalyq ósim jáne turǵyndardyń ál-aýqaty artqanyn baiqaimyz. Alaida, quqyq qorǵaý organdary qyzmetiniń máseleleri eshqashan ózektiligin joǵaltqan emes. Biz tiisti sharalar qabyldap, zańnamalarǵa ózgerister engizýdemiz, – dedi Elbasy.
Memleket basshysy burynǵy kezde tirkelgen qylmystar sany aldyńǵy jylǵy kórsetkishten kóp bolsa, quqyq qorǵaý organdary jazalanyp otyrǵanyn aitty.
– Jazadan qashyp, málimetterdi jasyrǵan nemese ózgertken jaittar kezdesip jatatyn. Al qazir faktiler mindetti túrde tirkelýi tiis, – dedi Nursultan Nazarbaev.
Qazaqstan Prezidentine Úkimettiń keńeitilgen otyrysynda berilgen tapsyrmalardy oryndaý barysynda biznes ókilderine júrgiziletin tekserister sanyn azaitý maqsatymen qabyldanǵan sharalar týraly aityldy. Budan bólek, Bas prokýror quqyq qorǵaý salasyndaǵy memleketaralyq qarym-qatynastardy nyǵaitý, ekonomikalyq quqyq buzý jaittarymen kúresý úshin kadrlar daiarlaý jóninde júrgizilip jatqan is-sharalardy atap ótti.
J.Asanovtyń aitýy boiynsha, Bes institýtsionaldyq reformany jáne Qazaqstan Prezidentiniń «Qazaqstannyń úshinshi jańǵyrýy: jahandyq básekege qabilettilik» atty joldaýyn iske asyrý barysynda qazirgi ýaqytta prokýratýra organdary aldyna qoiylǵan mindetterdi oryndaý, atap aitqanda, ákimshilik jáne qylmystyq úderisterdi elektrondyq-tsifrlyq formatqa kóshirý, sondai-aq jekelegen jobalardy iske asyrý úshin barlyq qajetti sharalar qabyldanýda.
– Qoǵamdyq qaýipsizdikti jaqsartýdyń taǵy bir indikatory – bas bostandyǵynan aiyrylǵandar sany. Qazaqstanda olardyń sany 90-shy jyldardyń basynda 100 myńǵa jýyq edi, búginde bas bostandyǵynan aiyrý oryndarynda odan úsh ese tómen – 36 myń adam otyr, – dedi Bas prokýror.
Sońynda Memleket basshysy el zańnamasy normalarynyń saqtalýyn baqylaityn organ retinde prokýratýranyń airyqsha rólin atap ótip, Bes institýtsionaldyq reforma men Qazaqstan halqyna joldaýdyń iske asyrylý barysyn qatań baqylaý qajettigin aitty.
Elbasy kezdesý qorytyndysy boiynsha birqatar naqty tapsyrma berdi.
Ult portaly
