Qasym-Jomart Toqaev Bas prokýrordyń elimizdegi zań normalarynyń saqtalýy jóninde esebin tyńdady, dep habarlaidy "Ult aqparat" Aqordanyń resmi saityna silteme jasap.
Prezidentke eldegi qylmystyq ahýal, sonyń ishinde, alaiaqtyq, balalarǵa qatysty zorlyq-zombylyq, zańsyz esirtki ainalymy jáne basqa da qaýipti quqyq buzýshylyqtarǵa qarsy kúresti úilestirý sharalary týraly aqparat berildi.
Ǵizat Nurdáýletov qylmystyq is júrgizýdiń úsh býyndy modeline ótýdiń alǵashqy kezeńniń iske asyrylý barysy jáne 2022 jyldan bastap engizile bastaityn ekinshi kezeńge daiyndyq jóninde esep berdi.
Memleket basshysyna el ishinde rezonans týdyrǵan qylmystyq isterdi tergeý nátijeleri jáne qoǵamdyq múddelerdi qorǵaý jónindegi jumystardyń qorytyndysy týraly baiandaldy. Bas prokýrordyń málimetine sáikes, prokýratýra organdarynyń qabyldaǵan sharalarynyń nátijesinde jyl basynan beri 5 myńǵa jýyq azamattyń, 92 myń kásipkerdiń quqyqtary qorǵalyp, biýdjetke 17 milliard teńge qaitarylǵan. 11 myńnan astam tulǵa túrli jaýapkershilikke tartylǵan.
Sondai-aq qylmystyq-quqyq salasyndaǵy halyqaralyq yntymaqtastyq máseleleri talqylandy. Atap aitqanda, Bas prokýror ózge eldermen jasalatyn kelisimder men alda bolatyn kópjaqty is-sharalarǵa qatysý josparlarymen bólisti.
Qasym-Jomart Toqaev qoǵamdyq ómirdiń barlyq salasynda zań ústemdigin qamtamasyz etýdiń mańyzdylyǵyn atap ótip, Ǵizat Nurdáýletovke birqatar tapsyrma berdi.
