Memleket basshysy Nur-Sultan qalasynyń ákimi Altai Kólginovti qabyldady, dep habarlaidy Aqorda.
Qasym-Jomart Toqaevqa biylǵy birinshi toqsannyń qorytyndysy boiynsha elordanyń áleýmettik-ekonomikalyq jáne infraqurylymdyq damýy jóninde esep berildi.
Elorda ákimdigi Prezidenttiń tapsyrmasy boiynsha áleýmettik nysandar salý, turǵyn úiler alabyn damytý, shaǵyn jáne orta biznesti qoldaý, qurylysy uzaqqa sozylǵan nysandardyń jumysyn aiaqtaý, jekemenshik sektordan investitsiia tartý jóninde júieli jumystar júrgizip jatyr. Atap aitqanda, biylǵy úsh ai ishinde 600 myń sharshy metrden astam turǵyn úi paidalanýǵa berilgen. Qala ekonomikasyna 154 milliard teńgeden astam qarjy tartylǵan. Jekemenshik sektordan investitsiia tartý kólemi byltyrǵy jyldyń osy kezeńimen salystyrǵanda 4,3 paiyzǵa ósken. 2021 jyly 1,2 trillion teńgeden astam qarjy tartylǵan.
Memleket basshysyna sorǵy-súzgish stantsiiasynyń (SSS-3) qurylysy, nóser kárizderi, kárizdik tazartý qurylystaryn (KTQ-2) jobalaý, gazdy qazandyqtar men basqa da nysandar týraly málimet berildi.
Budan bólek Altai Kólginov Qasym-Jomart Toqaevqa biyl 200-den astam aýla men qoǵamdyq oryndarǵa (baqtar, saiabaqtar men býlvarlar) abattandyrý jumystary júrgiziletini jóninde aitty.
Prezident qala jurtshylyǵynyń pikirin eskere otyryp, elordany josparly túrde odan ári damytý jáne abattandyrý jumystaryn jalǵastyrýdy tapsyrdy.
