Memleket basshysy Qasym-Jomart Toqaev Almaty qalasyna jumys sapary aiasynda jańadan ashylǵan Áleýmettik qyzmet kórsetý úiine bardy, dep habarlaidy "Ult aqparat" Aqordaǵa silteme jasap.
Prezident qyzmet kórsetý zalyn aralap kórip, ortalyqtyń kúndelikti atqaryp jatqan jumystarymen tanysty. Memleket basshysyna mekemeniń respýblika boiynsha ázirge jalǵyz áleýmettik oryn ekeni jáne osy tájiribeni el kóleminde qoldanysqa engizý qarastyrylyp jatqany jóninde málimet berildi.
Bul mekeme halyqtyń áleýmettik jaǵdaiy tómen toptaryna, turmystyq máselelerimen júgingen azamattarǵa «bir tereze» qaǵidaty boiynsha túrli salada qyzmet kórsetedi. Atalǵan ortalyqqa tirshilik taýqymetin tartqan, otbasylyq kelispeýshilik pen qiyndyqtar kórgen azamattar júginetini eskerilip, onda advokat, psiholog bólmeleri ashylǵan. Sondai-aq munda balalarymen kelgen qonaqtarǵa yńǵaily bolý úshin oiyn alańy da qarastyrylǵan.
