Foto: Aqorda
Qasym-Jomart Toqaev Ýolter Edýard Dendi atyndaǵy neirohirýrgiia qoǵamdastyǵynyń dúniejúzilik H kongresine qatysý úshin Astanaǵa kelgen álemdik neirohirýrgiia salasynyń ókilderin qabyldady, dep habarlaidy Ult.kz.
Prezidenttiń aitýynsha, mundai forýmnyń Qazaqstanda ótýi otandyq neirohirýrgiia jetistikteriniń keńinen moiyndalǵanyn kórsetedi. Sonymen qatar Memleket basshysy Kongress neirohirýrgiia salasyndaǵy halyqaralyq yntymaqtastyqty damytýǵa zor úles qosyp, ozyq tájiribe men tehnologiia almasýǵa yqpal etetinine senim bildirdi.
"Ult saýlyǵy – kez kelgen eldiń qarqyndy damýynyń negizi. Sondyqtan densaýlyq saqtaý isin jan-jaqty órkendetý memlekettik saiasatymyzdyń negizgi basymdyǵy sanalady. Qazaqstan meditsinalyq infraqurylymdy jańǵyrtýǵa, maman daiarlaýǵa, úderisterdi tsifrlandyrýǵa jáne atalǵan salaǵa innovatsiialyq ázirlemelerdi engizýge mol qarjy bóledi", – dedi Prezident.
Qasym-Jomart Toqaev Qazaqstan neirohirýrgiiada jasandy intellektini qoldanýǵa airyqsha mán beretinine nazar aýdardy. Sol arqyly meditsinanyń joǵary tehnologiialy salalaryn belsendi damytýdy qolǵa alǵanyn jetkizdi. Onyń aitýynsha, tsifrly jáne robotty tehnologiialardyń arqasynda otandyq neirohirýrgiia salasy órkendep keledi.
