Memleket basshysy Aqtoǵai ken baiytý keshenine bardy, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev «KAZ Minerals Aktogay» JShS-ne qarasty Aqtoǵai ken baiytý keshenine baryp, ondaǵy ekinshi ken baiytý fabrikasyn paidalanýǵa berý rásimine qatysty. Bul kenishtiń mys óndirý jóninen álemdegi iri ken oryndarynyń qataryna qosylýyna múmkindik berdi.
Prezident keshendi aralap kórý barysynda «KAZ Minerals Aktogay» kompaniiasy jumysynyń negizgi kórsetkishterimen tanysyp, ken óndirý protsesin kórdi. Sodan keiin Memleket basshysy jańa sýlfid fabrikasynyń jumysyn bastaýǵa resmi túrde ruqsat berdi jáne kásiporyn qyzmetkerleriniń aldynda sóz sóiledi.
Qasym-Jomart Toqaev jiynǵa qatysýshylardy ken baiytý fabrikasynyń iske qosylýymen quttyqtap, ulttyq indýstriiany damytýǵa tyń serpin beretin jobanyń strategiialyq mańyzy bar ekenin aitty.
– Men Joldaýymda byltyr indýstriialandyrýdyń 10 jyldyǵynda óńdeý ónerkásibiniń ekonomikany damytýǵa qosqan úlesi alǵash ret taý-ken ónerkásibiniń úlesinen asyp túsip, 13 paiyzǵa jetkenin aitqan edim. Biylǵy 8 aidyń qorytyndysy boiynsha óńdeý ónerkásibiniń ósý qarqyny saqtalyp, shamamen 6 paiyzǵa jetip otyr. Indýstriialandyrý kartasy aiasynda 12 myń jańa jumys orny ashylyp, 120-dan astam jańa óndiris iske qosyldy. Jyl sońyna deiin «Ónerkásip saiasaty týraly» Zań qabyldanady. Jalpy bizdiń mindetimiz – 2025 jylǵa qarai óńdeý ónerkásibiniń eksportyn 1,5 ese, al eńbek ónimdiligin 30 paiyzǵa arttyrý. Ol úshin bizge Indýstriia 4.0 elementteri bar ári ónimderin eksporttaityn zamanaýi kásiporyndar qajet. Jańa ken baiytý fabrikasy osyndai talaptarǵa sai keledi, – dedi Prezident.
Sonymen qatar Prezident óz sózinde kásiporyn qyzmetkerleriniń el ekonomikasyn damytýǵa zor úles qosyp otyrǵanyn atap ótti. Memleket basshysy jańa fabrikany iske qosýdyń áleýmettik-ekonomikalyq turǵydan tiimdi tustaryn aitty.
– Óńdelgen ónimniń eksporty artady. 700 jańa jumys orny ashylyp, salyqtan biýdjetke qosymsha 80 million dollar kiris kiredi. Kombinat Shyǵys Qazaqstan oblysyndaǵy jańa áleýmettik nysandardyń qurylysyna, bilim berý jáne emdeý mekemeleriniń jabdyqtalýyn jaqsartýǵa belsendi atsalysady. Bul – biznestiń áleýmettik jaýapkershiliginiń laiyqty úlgisi, – dedi Qasym-Jomart Toqaev.
Memleket basshysy kásiporynnyń biregeiligin atap ótip, keshen basshylyǵynyń áleýmettik jaýapkershiligin joǵary baǵalady.
– Qazaqstannyń Tuńǵysh Prezidenti – Elbasy Nursultan Ábishuly Nazarbaevtyń kúsh-jigeriniń arqasynda elimizde indýstriia salasynda osyndai iri nysandar boi kóterýde. Mundai nysandar ónerkásiptiń mánin túsinetin álemdik jáne indýstriialyq qoǵamdastyqtardyń jiti nazarynda. Bul – biznestiń áleýmettik jaýapkershilikti sezinýiniń aiqyn dáleli. Kombinat basshylyǵyna áleýmettik jáne turmystyq máselelerge basa mán bergeni úshin alǵys bildiremiz, – dedi Prezident.
Prezident fabrikany qysqa merzim ishinde salyp bitirgen qurylysshylarǵa rizashylyǵyn bildirdi.
– Bul Táýelsizdiktiń 30 jyldyǵyna laiyqty tartý boldy. Men buǵan deiin osyndai naqty jobalardy júzege asyrýǵa mán berý qajettigin aitqan edim. Jańa kásiporyn – sonyń aiqyn dáleli, – dedi Memleket basshysy.
Sonymen qatar fabrikany iske qosý rásiminde «KAZ Minerals» direktorlar keńesiniń tóraǵasy Oleg Novachýk jáne kásiporynnyń jas mamandary sóz sóilep, Qazaqstan Prezidentine jan-jaqty qoldaý kórsetkeni úshin alǵys aitty.
«KAZ Minerals» kompaniialar toby Indýstriialyq-innovatsiialyq damý memlekettik baǵdarlamasyn júzege asyrý aiasynda 2017 jyly Aqtoǵai ken baiytý kesheniniń óndiristik qýatyn keńeitý jobasyn qolǵa aldy. Kombinattyń ekinshi fabrikasynyń iske qosylýy ken óńdeý kólemin jylyna 25-ten 50 million tonnaǵa deiin arttyrýǵa múmkindik beredi. Jalpy, Aqtoǵai I jáne Aqtoǵai II jobalaryn qosa alǵanda ken ornyn igerýge tartylǵan investitsiianyń mólsheri 3,2 milliard dollarǵa jetti.
2022 jyldan bastap ken ornynda 190 myń tonna mys, onyń ishinde 20 myń tonna katodty mys óndiriledi dep josparlanyp otyr. Keshende jalpy 3 myńnan astam adam jumys isteidi. Kásiporynda ozyq tehnologiialar, sonyń ishinde jasandy intellektige negizdelgen baǵdarlamalar keńinen qoldanylady.
