Memleket basshysy Qasym-Jomart Toqaev Aqmola jáne Soltústik Qazaqstan oblystarynyń ákimderimen telefon arqyly sóilesti. Ákimder Prezidentke óńirlerdegi qazirgi ahýal týraly baiandady.
Bul jaiynda Prezidenttiń baspasóz hatshysy Berik Ýáli Facebook paraqshasynda málimet taratty.
«Aqmola oblysynyń ákimi Ermek Marjyqpaev óńirdiń áleýmettik-ekonomikalyq damý kórsetkishteri, sý tasqynynyń aldyn alý sharalary, vaktsina salý barysy, Arshaly jáne Tselinograd aýdandaryn kógildir otynmen qamtamasyz etý máseleleri, Prezidenttiń Qosshy aýylynyń áleýmettik jáne injenerlik infraqurylymdyq jaǵdaiyn jaqsartýǵa qatysty buǵan deiin bergen tapsyrmasynyń oryndalý barysy jaiynda aqparat berdi. Soltústik Qazaqstan oblysynyń ákimi Qumar Aqsaqalov aimaqtaǵy sanitarlyq-epidemiologiialyq jaǵdai, sý tasqynyn boldyrmaýǵa qatysty qabyldanyp jatqan sharalar, kóktemgi egin egý jumystaryna daiyndyq barysy, jumys kúshi kóp óńirlerden Soltústik Qazaqstan oblysyna qonys aýdaryp jatqan azamattardy «Eńbek» baǵdarlamasy boiynsha baspanamen qamtý máselesi jaiynda aitty» dep jazady Berik Ýáli.
Áńgime sońynda Qasym-Jomart Toqaev Ermek Marjyqpaev pen Qumar Aqsaqalovqa aimaqtardaǵy sanitarlyq-epidemiologiialyq ahýaldy turaqtandyrýǵa, kóktemgi egis naýqanyn joǵary deńgeide atqarýǵa jáne taǵy da basqa máselelerge qatysty birqatar tapsyrma berdi.
