Foto: Aqorda
Prezident óńirdegi agroónerkásip kesheniniń damýymen tanysyp, áleýmettik nysandardy aralap kóredi. Sapar aiasynda astyqty óńirler ákimderiniń qatysýymen egin jinaý naýqanyna arnalǵan keńes ótkizý josparlanǵan, dep habarlaidy Ult.kz.
Memleket basshysy Aqmola oblysyndaǵy egin jinaý naýqanymen tanysty. Prezidentke biyl óńirdegi egis alqabynyń kólemi 300 myń gektarǵa ulǵaiyp, 5,5 million gektarǵa jetkeni baiandaldy. Boljam boiynsha aimaqtaǵy agroqurylymdar 7 million tonnadan astam dándi, 650 myń tonnadan asa maily daqyl jinamaq. Búginge deiin 3,6 million tonna astyq bastyryldy. Orta eseppen 1 gektar alqaptan 15,4 tsentner ónim alynǵan. Jinalǵan ónimniń sapasy joǵary.
Memleket basshysynyń tapsyrmasyna sáikes, óńirde mol ónim beretin maily daqyldar alqabyn ulǵaitý jumystary jalǵasyp jatyr.
2023 jylmen salystyrǵanda mundai egistik alańynyń kólemi 2,5 ese artyp, 495 myń gektarǵa jetken.
Osyndai kópbeiindi sharýashylyqtardyń biri – «Zerendi saqtaý ónimderi» JShS. Kásiporyn direktory Erbol Jaýarovtyń aitýynsha, sharýashylyq dándi jáne burshaqty daqyldardy ósirýmen, siyr, jylqy tuqymdaryn asyldandyrýmen ainalysady.
Budan bólek, seriktestiktiń qýattylyǵy 2,5 myń tonna bolatyn mai zaýyty, qus fabrikasy men diirmeni bar.
Prezident Aqmola oblysyndaǵy aýyl sharýashylyǵy kásiporyndarynyń jetekshilerimen salanyń jai-kúii, sharýalardyń jetistikteri, sondai-aq qordalanǵan máseleleri jóninde áńgimelesti.
– Biyl aýa raiy qolaily. Úkimet qoldaý kórsetip otyr. Janar-jaǵarmaimen qamtamasyz etip, aldyn ala jeńildetilgen nesie berýde. Astyq túsimi jaqsy bolady dep oilaimyz. Barshańyzǵa tabys tileimin. Joldaýda atap ótkenimdei, basty mindet – aýyl sharýashylyǵynda tereń óńdeý óndirisin damytý. Byltyr aýyl sharýashylyǵyndaǵy ónim kólemi 8 trillion 250 milliard teńgeni qurady. Bul kóp te, az da emes. Óńirdegi basqa eldermen salystyrǵanda aýyl sharýashylyǵy jaqsy nátijege qol jetkizdi. Biraq ishki jalpy ónim kólemine shaqqanda, bul 6 paiyz ǵana. Iaǵni ekonomikadaǵy aýyl sharýashylyǵynyń úlesin arttyrý qajet. Aýyl sharýashylyǵy – biz úshin tabysty sala. 12 million tonna bidai eksporttaý áleýeti – óte joǵary kórsetkish. Qazirdiń ózinde astyqty Eýropa elderi satyp alyp jatyr. Joldaýda aitqanymdai, astyqtyń alǵashqy legi, shamamen 15 myń tonna bidai Vetnamǵa joldandy, – dedi Memleket basshysy.
