Foto: Aqorda
Memleket basshysy Qasym-Jomart Toqaev qazaqstandyqtardy 8 naýryz – Halyqaralyq áielder kúnimen quttyqtady, dep habarlaidy Aqordanyń baspasóz qyzmeti.
- Qymbatty hanymdar!
Barshańyzdy Halyqaralyq áielder kúnimen shyn júrekten quttyqtaimyn! Bul – sulýlyq pen meiirimdiliktiń simvolyna ainalǵan shýaqty mereke.
Halqymyz ejelden anasyn ardaqtap, qyzdaryn qadirlei bilgen. Kóptegen arýlarymyzdyń esimi tól tarihymyzǵa altyn árippen jazylǵan.
Qazir Qazaqstanda áielder túrli kásippen ainalysyp, bizneste jáne qoǵamdyq qyzmette zor tabysqa jetip júr. Olar biik belesterdi baǵyndyryp qana qoimai, sanaly urpaq tárbieleý jolynda aianbai eńbek etip keledi.
Barlyq áielderdiń adal eńbegi eń joǵary baǵaǵa laiyq. Osy sátti paidalanyp, Qazaqstandaǵy analar men arýlardyń bárine shynaiy rizashylyǵymdy bildiremin.
Memleket áielderdiń quqyqtaryn qorǵaýǵa jáne barsha azamattyń jan-jaqty damýy úshin jaǵdai jasaýǵa árdaiym basa nazar aýdarady.
Janashyrlyq, jaýapkershilik, jasampazdyq siiaqty asyl qasietterdi boiyna sińirgen áielder qaýymy elimizdegi aýqymdy ózgeristerdi júzege asyrýǵa zor úles qosa beredi dep senemin.
Barshańyzǵa myqty densaýlyq, baq-bereke tileimin! - delingen Memleket basshysynyń quttyqtaýynda.
Osyǵan deiin Memleket basshysy Qasym-Jomart Toqaevtyń qatysýymen 8 naýryz – Halyqaralyq áielder kúnine arnalǵan saltanatty jiyn ótti.
Sondai-aq Prezident jarlyǵymen birqatar sala mamandary memlekettik nagradalarmen marapattalady.
