Sýret: zhuk.msr.mosreg.ru
Memleket 70 myń qazaqstandyqtyń jalǵa alǵan úiiniń jaldaý aqysynyń jartysyn tóleýge kómektesedi, - dep habarlaidy Indýstriia jáne infraqurylymdyq damý ministrliginiń baspasóz qyzmeti.
Vedomstvo málimetinshe, Memleket basshysynyń tapsyrmasy aiasynda jekelegen sanattarǵa jatatyn azamattardyń máselelerin jedeldetip sheshý úshin elimizde jeke turǵyn úi qoryndaǵy baspananyń jalǵa alý aqysyn sýbsidiialaý tetigi iske asyrylyp jatyr.
"2023 jyly bul maqsatqa 50 milliard teńge bólinedi. Bul amal 70 myńǵa jýyq adamdy qamtýǵa múmkindik berip, olardyń baspanany jalǵa alýdaǵy tóleminiń 50 paiyzyn óteýge septesedi", - delingen habarlamada.
Atalǵan baǵdarlamaǵa qatysý úshin ótinishti Otbasybank.kz platformasyna jiberýge bolady. Sýbsidiialaýǵa ótinishter elektron tsifrly qoltańba (ETsQ) arqyly qabyldanady. Sonymen qatar, jalǵa beriletin turǵyn úidi azamattar ózderi izdep, tańdaýy tiis. "Otbasy bank" turǵyn úidi jalǵa alý boiynsha sýbsidiialardy jaldaý shartynyń qoldanylý merzimi men tólemderdiń kestesine sáikes ai saiyn tóleidi.
Osy oraida jalǵa alý tólemderi boiynsha memlekettik qoldaýǵa 4 sanatqa sáikes turǵyn úige kezeginde turǵan azamattar, sonyń ishinde I jáne II toptaǵy múgedekter, múmkindigi shekteýli balalardy tárbielep otyrǵan otbasylar, jetim balalar jáne kópbalaly otbasylar úmitker bola alady. Bul rette úmitker otbasylardyń keiingi 6 aidaǵy orta ailyq jiyntyq tabysynyń mólsheri januianyń ár múshesine shaqqanda eń tómengi kúnkóris deńgeiinen aspaýǵa tiis.
"Otbasy banki" sýbsidiia alýshylardyń sáikestigine monitoring júrgizip, sondai-aq, ai saiyn tólem tártibin qadaǵalady. Óz kezeginde jergilikti ákimdikter keminde toqsanyna bir ret jalǵa beriletin turǵyn úidi tekseredi. Bul oraida jaqyn týystarynan, buryn nekede turǵan jubailarynan jáne erli-zaiyptylardyń týystarynan turǵyn úidi jalǵa alýǵa, sondai-aq, aitylǵan baspanany qaita jaldaýǵa ótkizýge tyiym salynatynyn eske sala ketken jón", - delingen habarlamada.
